ހިތަދޫ ފްލޫ ކްލިނިކަށް ދެއްކި އިތުރު މީހަކު ކޮވިޑަށް ޕޮޒިޓިވްވެއްޖެ.
"އައްޑޫލައިވް"އަށް މައުލޫމާތު ލިބިފައިވާ ގޮތުގައި މިއަދު ހިތަދޫއިން ކޮވިޑަށް ޕޮޒިޓިވްވެފައިވަނީ 25 އަހަރުގެ މީހެކެވެ.
އައްޑޫ އިކުއިޓޯރިއަލް ހޮސްޕިޓަލް (އޭއީއެޗް) އިން ބުނީ ފްލޫ ކްލިނިކަށް ދެެއްކި މީހަކު ކޮވިޑި-19 އަށް ޕޮޒިޓިވްވުމާއި ގުޅިގެން އެމީހާގެ ކޮންޓެކްޓު ޓްރޭސިންގެ މަސައްކަތް ފަށާފައިވާ ކަމަށެވެ.
މައުލޫމާތު ލިބިފައިވާ ގޮތުގައި މިއަދު ޕޮޒިޓިވްވީ މީހަކީ ކޮވިޑު ފެތުރިފައިވާ ރަަށަކަށް ދަތުރުކޮށްފައިވާ މީހެއް ނޫނެވެ. އެހެންވެ އޭނާއަށް ކޮވިޑު ޖެހިފައިވަނީ ކިހިނެއްކަމެއް އަދި ސާފެއް ނުވެއެވެ.
ހިތަދޫއިން މިއަދު މީހަކު ކޮވިޑު-19 އަށް ޕޮޒިޓިވްވީ އިރު މިދިޔަ ހޮނިހިރު ދުވަހު ސ. ހިތަދޫ ފްލޫ ކްލިނިކަށް ދެއްކި ފޭދޫގެ 28 އަހަރުގެ ޒުވާނަކު ވަނީ ކޮވިޑަށް ޕޮޒިޓިވްވެފައެވެ. އެމީހާގެ ކޮންޓެކްޓު ޓްރޭސިންގެ ތެރެއިން ނެގުނު ސާމްޕަލްތައް ވަނީ ނެގެޓިވްވެފައެވެ.