ސ. ހިތަދޫއިން ކޮވިޑު-19 އަށް ޕޮޒިޓިވްވީ މީހުންގެ ޑައިރެކްޓު ކޮންޓެކްޓުންގެ ތެރޭގައި ހިމެނޭ އިތުރު މީހަކު މިއަދު ކޮވިޑު-19 އަށް ޕޮޒިޓިވްވެއްޖެއެވެ.
މިއަދު ޕޮޒިޓިވްވީ މީހާ އާއި އެކު މި ކްލަސްޓަރ އިން ކޮވިޑަށް ޕޮޒިޓިވްވީ މީހުންގެ އަދަދު މިވަނީ 10 އަށް އަރާފައެވެ.
އައްޑޫ އިކުއިޓޯރިއަލް ހޮސްޕިޓަލް (އޭއީއެޗް) އިން ބުނީ ހިތަދޫ ކްލަސްޓަރގެ ކޮންޓެކްޓުންގެ ގޮތުގައި 36 މީހުން ފާހަގަކުރެވިފައިވާ ކަމަށެވެ. އެމީހުންގެ ސާމްޕަލް ނަގައި ޓެސްޓު ކުރުމުގެ މަސައްކަތް ކުރަމުން އަންނަކަމަށް އޭއީއެޗްއިން ވަނީ ބުނެފައެވެ.
އައްޑޫގައި މިވަގުތު 3 ކްލަސްޓަރ އޮތް އިރު ކޮވިޑު އެކްޓިވް ކޭސްގެ އަދަދު މިވަނީ 25އަށް އަރާފައެވެ. އެއީ ހިތަދޫން ޕޮޒިޓިވްވި 10 މީހުންނާއި، ޝަންގްރިއްލާ ކަރަންޓީނުގައި ހުއްޓާ ޕޮޒިޓިވްވީ މީހެއްގެ އިތުރުން ހުޅުމީދޫން ކޮވިޑަށް ޕޮޒިޓިވްވި 14 މީހުންނެވެ.