ކޮވިޑުން ރައްކާތެރިވުމަށްޓަކައި މާބަނޑު މީހުންނަށް ފައިޒާ ވެކްސިން ދޭން ފަށާނެކަމަށް މޯލްޑިވްސް ޓެކްނިކަލް އެޑްވައިޒަރީ ގްރޫޕް އޮން އިމުނައިޒޭޝަންގެ ޗެއާމަން އަހުމަދު ފައިސަލް ވިދާޅުވެއްޖެއެވެ.
ފައިސަލް މިފަދައިން ވިދާޅުވީ ޓްވިޓަރގައި އައިޖީއެމްއެޗްގެ ޑައިޓީޝަން އާސިޔާ އަބްދުއްރަހީމް އަށް ޖަވާބުދެއްވަމުންނެވެ. ފައިސަލް ވިދާޅުވީ މާބނޑު މީހުންނަށް ވަރަށް އަވަހަށް ފައިޒާ ވެކްސިން ދޭން ފަށާނެކަމަށެވެ. ނަމަވެސް ވެކްސިން ދޭން ފަށާނީ ކޮންއިރަކުކަމެއް ފައިސަލް ވިދާޅެއް ނުވެއެވެ.
އެޗްއޯއީސީއިން ރޭ ބޭއްވި ނޫސް ކޮންފަރެންސްގައި ޑރ.އައިޝަތު އެލީނާ ވިދާޅުވީ ކޮވިޑަށް ޕޮޒިޓިވްވާ މާބަނޑު މީހުންގެ އަދަދު ގިނަ ވަމުން އަންނަ ކަމަށެވެ. އެގޮތުން ދަރުމަވަންތަ ހޮސްޕިޓަލަށް ބަލާލާއިރު ވެސް މިދިޔަ ހަފްތާގައި ގިނަ އަދަދަކަށް ޕޮޒިޓިވް ވެފައިވާ މާބަނޑު މީހުން އެބަތިބި ކަމަށް އެލީނާ ވިދާޅުވިއެވެ. އަދި އޭގެތެރެއިން އެއް ފަރާތެއް ސީރިއަސް ހާލަތުގައި ދަރުމަވަންތަ ހޮސްޕިޓަލުގެ ޑީއެޗް11 ގައި އެބައޮތް ކަމަށް ވެސް އެލީނާ ވިދާޅުވިއެވެ.