ރައީސް ނަޝީދުގެ ސާޖަރީތައް ކާމިޔާބު ކަމަށާއި، އިތުރު ސާޖަރީއެެއް ހަދަން ޖެހޭކަމަށް އެޑީކޭ ހޮސްޕިޓަލުން ބުނެފިއެވެ.
ރައިސް މުހައްމަދު ނަޝީދަށް އަމާޒުކޮށް ރޭ މާލޭގައި ދިން ހަމަލާއާއި ގުޅިގެން އެމަނިކުފާނަށް ފަރުވާ ދިނުމަށް ގެންދިޔައީ އޭޑީކޭ ހޮސްޕިޓަލަށެވެ. އޭޑީކޭ ހޮސްޕިޓަލަށް އެމަނިކުފާން ގެންދެވުނު އިރު ހަށިކޮޅަށް އެކިވަރުގެ ޒަހަމްތަކެއް ވަނީ ލިބިފައެވެ. އަދި އެޒަހަމްތަކަށް ފަރުވާ ދިނުމަށް ހޭނައްތައިގެން ސާޖަރީތަކެއް ހަދާފައިވާ އިރު އިތުރު ސާޖަރީއެއް ހަދަން ޖެހޭކަމަށް އޭޑީކޭއިން ވަނީ ބުނެފައެވެ.
ރައީސް ނަޝީދު އާއި އަރިސް ބިލެއްދޫ ދާއިރާގެ އަހުމަދު ހަލީމް ( ދޮންބިލެތް) ރާއްޖެޓީވީއަށް މައުލޫމާތުދެމުން ވިދާޅުވީ ރައީސް ނަޝީދު އޮންނެވީ އައިސީޔޫގައި ކަަމަށާއި، އަދިވެސް ހޭފުޅުނާރާ ކަމަށެވެ.
ބައެއް މީޑިއާތަކުން ރިޕޯޓުކޮށްފައިވާ ގޮތުގައި މިހާތަނަށް ތިން ސާޖަރީއެއްވަނީ ކޮށްފައެވެ. އޭގެ ތެރޭގައި ފުއްޕާމެޔާއި، ގޮހޮރުގެ ސާޖަރީއެއް ހިމެނެއެވެ.
އޭޑީކޭއިން ވަނީ ރައީސް ނަޝީދުގެ ހާލު ސްޓޭބަލްކަށް ވިދާޅުވެފައެވެ.
ރައިސް ނަޝީދަށް އަމާޒުކޮށް ދެވުނު ހަމަލާގެ ތަހްގީގަށް އޮސްޓްރޭލިއާގެ ފެޑަރަލް ޕޮލިހުންގެ އެހި ހޯދާނެކަމަށާއި، މާދަމާ ފެޑަރަލް ޕޮލިހުންގެ ޓީމެއް ރާއްޖެ އަންނާނެކަމަށް ރައީސް އިބްރާހިމް މުހައްމަދު ސޯލިހު ރޭވަނީ ވިދާޅުވެފައެވެ. އަދި މި މައްސަލަ ސީރިއަސް މައްސަލައެެއްގެ ގޮތުގައި ބަލާނެކަމަށް ފުލުހުން ވަނީ ބުނެފައެވެ.