ރައްޔިތުންގެ މަޖިލީހުގެ ރައިސް މުހައްމަދު ނަޝީދުއަށް އަމާޒުކޮށް ރޭ ދީފައިވަނީ ޓެރަރިސްޓު ހަމަލާއެއް ކަމަށް ފުލުހުން ބުނެފިއެވެ.
ފުލުހުން މިއަދު ނެރުނު ބަޔާނެއްގައި ބުނީ މިހާތަނަށް ލިބިފައިވާ މައުލޫމާތާއި، ހޯދިހޯދުންތަކުން ރޭ ރައީސް ނަޝީދަށް އަމާޒުކޮށްދެވުނު ހަމަލާއަކީ ޓެރަރިސްޓު ހަމަލާއެއް ކަމަށެވެ.
މި ހަމަލާގެ ތަހްގީގު ފުލުހުން ފަށާފައިވާ އިރު ތަހްގީގުގެ ދާއިރާއިންނާއި، ފޮރެންސިކްސްގެ ތެރެއިން ފުލުހުންނަށް ލިބެން ހުރި ހުރިހާ ވަސީލަތެއް ބޭނުން ކުރާނެކަމަށް ވަނީ ބުނެފައެވެ. އަދި އޮސްޓްރޭލިއާގެ ފެޑަރަލް ޕޮލިހުންގެ އެހީ އާއި ރާއްޖޭގައި މިވަގުތު ތިބި ޔޫއެންއޯޑީސީގެ ފަންނީ އިނގިރޭސިވިލާތުގެ ދެ ފަންނީ ބޭފުޅުންގެ އެހީ މިހާރުވެސް ތަހްގީގަށް ލިބެމުން އަންނަ ކަމަށެވެ.
ފުލުހހުން ބުނީ ރައީސް ނަޝީދަށް އަމާޒުކޮށްދެވުނު ހަމަލާ އާއި ގުޅިގެން ރައްޔިތުންގެ ސަލާމަތާއި، ރައްކާތެރިކަމަށްޓަކައި ދިވެހި ގައުމީ ދިފާއީ ބާރާއި، ފުލުހުން ގުޅިގެން މާލެ ތެރެ ބެލެހެއްޓުމުގެ ހާއްސަ ހަރަކާތެއް ފަށާފައިވާ ކަމަށެވެ.
ރޭގެ ހަމަލާ އާއި ގުޅިގެން އެ ސަރަހައްދުން ޝައްކުވާ އެއްވެސް ކަމެއްް ފާހަގަކުރެވިފައިވާނަމަ ފުލުހުންގެ ހޮޓްލައިން ނަންބަރު 9704000އަށް ގުޅުއްވައި މައުލޫމާތު ހިއްސާ ކުރުމަށް ފުލުހުން ވަނީ އެދިފައެވެ. އަދި މިގޮތުން ފޯރުކޮށްދޭ މައުލޫމާތު ސިއްރުކަން ފުލުހުން ހިފަހައްޓާނެ ކަމަށް ވަނީ ބުނެފައެވެ.
ނަޝީދަށް ދެވުނު ހަމަލާއަށް އެމަނިކުފާން ފަރުވާ ހޯދަވަމުން އަންނަ އިރު މިހާތަނަށް 3 ސާޖަރީއެއް ވަނީ ކުރައްވާފައެވެ.