ގިނަ ދުވަސްތަކެއްގެ މެދުކެނޑުމަކަށް ފަހު، ކުޅަދާނަ ބަތަލާ މަދޫރީގެ އެނބުރި އައުން ފާހަގަ ކުރާ ފިލްމް "ދޭދް އިޝްގިޔާ" އަންނަ ޖެނުއަރީ މަހުގެ 10 ގައި ރިލީޒް ކުރާ ގޮތަށް ހަމަޖައްސައިފި އެވެ.
މިއީ 2007 ވަނަ އަހަރުގެ ފްލޮޕް ފިލްމް "އަޖަ ނަޗްލޭ" އަށް ފަހު މަދޫރީ ފިލްމެއްގެ ލީޑް ރޯލަކުން ފެންނަ ފުރަތަމަ ފަހަރެވެ.
އޭނާ ވަނީ މި އަހަރުގެ އެންމެ ކާމިޔާބް އެއްް ފިލްމްގެ ތެރޭގައި ހިމެނޭ ރަންބީރު ކަޕޫރާއި ދީޕިކާ ޕަދްކޯންގެ "ޔަ ޖަވާނީ ހޭ ދީވާނީ" ގެ އައިޓަމް ލަވައެއް ވެސް ކުޅެފަ އެވެ.
މަދޫރީ ބޮޑު ސްކްރީނަށް އެނބުރި އަންނަ "ދޭދް އިޝްގިޔާ" އަކީ ވިޝާލް ބަރަދްވާޖް ޕްރޮޑިއުސްކޮށް، އަބިޝެކް ޗޯބޭ ޑައިރެކްޓްކޮށް 2011 ވަނަ އަހަރު ގެނެސް ދިން "އިޝްގިޔާ" ގެ ސީކްއެލްއެކެވެ.
އެހެން ނަމަވެސް ކުރީ ފިލްމްގެ ބަތަލާ ވިދިޔާ ބާލަންގެ ބަދަލުގައި ސީކްއެލުން ނަސީރުއްދީން ޝާހާއި އަރްޝަދު ވަރުސީ އާ އެކު ފެނިގެން ދާނީ މަދޫރީގެ އިތުރުން ހުމާ ގްރޭޝީ އެވެ.
މި ފިލްމްގެ ފުރަތަމަ ޓްރެއިލާ ވެސް ދާދި ފަހުން ވަނީ އާންމުކޮށްފަ އެވެ.
މީޑިއާ ރިޕޯޓްތައް ބުނާ ގޮތުގައި މަދޫރީ މުހިއްމު ރޯލެއް ކުޅެފައިވާ "ދޭދް އިޝްގިޔާ" ޖެނުއަރީ 10 ގައި ރިލީޒް ކުރާ އިރު، އޭނާ ލީޑްް ރޯލުން ފެނިގެންދާ "ގްލާބް ގޭންގް" ވެސް ހަމަ އެ ތާރީހުގައި ރިލީޒް ކުރަން ވަނީ ނިންމައިފަ އެވެ.
އެހެން ނަމަވެސް އެ ފިލްމްގެ ޕްރޮޑިއުސަރު އަނުބަވް ސިންހާ މިކަމާ ބެހޭ ގޮތުން އަދި އެއްވެސް އެއްޗެއް ނުބުނެ އެވެ.
އެހެންވެ ޖެނުއަރީ 10 އަކީ މަދޫރީގެ ދެ ފިލްމެއް އެއް ފަހަރާ ބެލުންތެރިންނާ ހަމައަށް އަންނާނެ ދުވަހެއްތޯ އަދި މުޅިން ކަށަވަރެއް ނުވެ އެވެ.
އެކަން އެގޮތަށް ވެއްޖެ ނަމަ މިއީ މަދޫރީގެ ފޭނުންނަށް ލިބޭނެ ވަރަށް ބޮޑު "ސަޕްރައިޒިން ހަދިޔާއަކަށް" ވެދާނެ އެވެ.