ސ. މީދޫންއިން މީހަކު ކޮވިޑަށް ޕޮޒިޓިވްވެއްޖެއެވެ.
ހުޅުމީދޫ ސިއްހީ މަރުކަޒު ހިންގުމާއި ހަވާލުވެ ހުންނެވި އިބްރާހިމް ޒުބައިރު (އިބުރޭ) ވިދާޅުވީ މީދޫން އިތުރު މީހަކު ކޮވިޑަށް ޕޮޒިޓިވްވެ، އެ ދެ ރަށުން ކޮވިޑަށް ޕޮޒިޓިވްވީ މީހުންގެ އަދަދު 19އަށް އަރާފައިވާ ކަމަށެވެ.
މީދޫއިން މިއަދު ކޮވިޑަށް ޕޮޒިޓިވްވެފައިވަނީ ހުޅުމީދޫ ފެނަކާގައި މަސައްކަތް ކުރާ މީހެކެވެ.
ހުޅުމީދޫއަށް ކޮވިޑު ފެތުރިފައިވަނީ އައްޑޫ އާއި މާލެ އާއި ދެމެދު ދަތުރުކުރާ "ނިއުލައިން" ބޯޓުގެ ފަޅުވެރިންތަކެއް ކޮވިޑު-19 އަށް ޕޮޒިޓިވްވުމާއި ގުޅިގެންނެވެ. މިހާތަނަށް މި ކްލަސްޓަރ އާއި ގުޅުންހުރި ބައެއް މީހުން ހިތަދޫ އާއި ފޭދޫން ވަނީ ކޮވިޑަށް ޕޮޒިޓިވްވެފައެވެ.
އައްޑޫގައި ކޮވިޑު ފެތުރޭތީ އެޗްޕީއޭއިން ވަނީ ހާއްސަ ފިޔަވަޅުތަކެއް އަޅާފައެވެ. އެގޮތުން ރޭގަނޑު 9 އިން ފެށިގެން ފަތިހު 4 ޖެހުމާއި ހަމައަށް ވަނީ ކާފިއު ހިންގާފައެވެ. އަދި ހުއްދަ ނެތި އެއް ރަށުން އަނެއް ރަށައް ދަތުރު ނުކުރެވޭ އިރު އެއްގެއިން އަނެއް ގެޔަށް ދިއުން ވަނީ މަނާކޮށްފައެވެ.
މިއަދު މީދޫއިން ޕޮޒިޓިވްވީ މީހާ އާއި އެކު މިވަގުތު އައްޑޫގެ ކޮވިޑު އެކްޓިވް ކޭސް އަކީ 38 އެވެ.