އަފްޣާނިސްތާނުގެ ވެރިރަށް ކާބުލްގެ ސެކަންޑަރީ ސްކޫލެއްގެ ކައިރީގައި މިއަދު ބޮމެއް ގޮއްވާލުމުގެ ސަބަބުން 25 މީހުން މަރުވެ ގިނަ އަދަދެއްގެ ބަޔަކު ޒަޚަމް ވެއްޖެއެވެ.
މި ހާދިސާ ހިނގާފައިވަނީ އެ ސްކޫލުން ކުދިންތައް ބޭރަށް ނިކުންނަން ދިޔަ ވަގުތެއްގައި ކަމަށް ރިޕޯޓްތައް ބުނެއެވެ. މަރުވެ އަދި ޒަޚަމްވި މީހުންގެ ތެރޭގައި ގިނައިން ހިމެނެނީ އަންހެނުން ކަމަށް ވެސް އެ ޤައުމުގެ ކަމާއިބެހޭ ފަރާތްތަކުން މައުލޫމާތު ދެއެވެ.
މި ހާދިސާ ހިނގި ސަރަހައްދުގެ މަގުމަތީގައި ފެންނަން ހުރީ އުކާލެވިފައިހުރި ސްކޫލް ދަބަސްތަކާއި ކުދިން ސްކޫލް ކުދިން ގެންގުޅޭ ފަދަ އާލާތްތައް ކަމަށް މަންޒަރު ދުށް ފަރާތްތަކާއި ހަވާލާދީ ބީބީސީއިން ރިޕޯޓް ކޮށްފައިވެއެވެ.
މީގެ ގާތްގަނޑަކަށް އަހަރެއްހާ ދުވަސްކުރިން އެ ރަށުގެ ހޮސްޕިޓަލެއްގެ މާބަނޑު އަންހެނުންގެ ވޯޑަކަށް ދިން މިފަދަ ހަމަލާގައި ވެސް ވަނީ 24 އަންހެނުންނާއި އެތައް ތުއްތު ކުދިންނެއްގެ ފުރާނަ ގޮސްފައެވެ.
މިއަދު ދެވުނު މި ހަމަލާގެ ސީދާ އަމާޒަކީ ކޮބައިކަމެއް އަދި ކަށަވަރު ވެފައިނުވާ ކަމަށް ކާބުލްގެ ފުލުހުން ބުނެއެވެ.