އިންޑިއާގެ 9،02،291 ކޮވިޑް ޕޭޝަންޓުން އޮކްސިޖަންގެ އެހީގައި ތިބި ކަމަށާއި، 1،70،841 ކޮވިޑް ޕޭޝަންޓުން ވެންޓިލޭޓަރުގައި އެބަތިބި ކަމަށް އިންޑިއާގެ ޔުނިއަން ހެލްތް މިނިސްޓަރ ހަރްޝް ވަރްދަން މިއަދު ވިދާޅުވެއްޖެއެވެ.
ހަރްޝް ވަރްދަން މިހެން ވިދާޅުވެފައިވަނީ އޮންލައިންކޮށް ބޭއްވުނު 25 ވަނަ މިނިސްޓަރުންގެ ބައްދަލުވުމުގައި މިހާރުގެ ޕެންޑަމިކްގެ ހާލަތާއިބެހޭ ގޮތުން ވާހަކަ ދައްކަވަމުންނެވެ. މިނިސްޓަރު ވިދާޅުވީ 1.34 އިންސައްތަ ކޮވިޑްގެ ކޭސްތައްވަނީ އައިސީޔޫގައި ކަމަށާއި، 0.39 އިންސައްތަ މީހުން ތިބީ ވެންޓިލޭޓަރުގައި ކަމަށެވެ. އަދި 3.70 އިންސައްތަ ކޮވިޑް ޕޭޝަންޓުން ތިބީ އޮކްސިޖަންގެ އެހީގައި ކަމަށް ވެސް އޭނާ ވިދާޅުވިއެވެ.
މުޅި ޤައުމަށް ބަލާއިރު އައިސީޔޫ އެނދުތަކުގައި މިވަގުތު ތިބި ޕޭޝަންޓުންގެ އަދަދަކީ 4،88،861 ކަމަށާއި، އޭގެ ތެރެއިން 1،70،841 މީހުން މިވަގުތު ތިބީ ވެންޓިލޭޓަރުގެ އެހީގައި ކަމަށް މިނިސްޓަރު ހަރްޝް ވަރްދަން ވިދާޅުވިއެވެ.
މި ބައްދަލުވުމުގައި ބައިވެރިވެފައިވަނީ މިނިސްޓަރ އޮފް އެކްސްޓާނަލް އެފެއާޒް އެސް. ޖެއިޝަންކަރް، މިނިސްޓަރ އޮފް ސިވިލް އޭވިއޭޝަން ހަރްދީޕް އެސް ޕޫރީ، މިނިސްޓަރ އޮފް ސްޓޭޓް ފޮރ ޕޯޓްސް ޝިޕިންގ އެންޑް ވޯޓަރ ވޭއިސް އެންޑް ކެމިކަލް އެންޑް ފާޓިލައިޒާސް މަންސުކް މަންޑަވިޔާ، އަަދި މިނިސްޓަރ އޮފް ސްޓޭޓް، މިނިސްޓްރީ އޮފް ހޯމް އެފެއާޒް ނިތްޔާނަންޑް ރާއީ ހިމެނެއެވެ. އަދި މީގެ އިތުރުން ވެސް ސިއްޚީ ދާއިރާގެ އިސް ބައެއް ވެރިން މި ބައްދަލުވުމުގައި ބައިވެރިވެފައިވެއެވެ.