ރޭ ލިންކް ރޯޑްގައި ކާރެއްގައި ޖެހިގެން 13 އަހަރުގެ އަންހެން ކުއްޖަކު މަރުވި މައްސަލާގައި ކާރު ދުއްވަން އިން މީހާ ފުލުހުން ހައްޔަރުކޮށްފި އެވެ.
ފުލުހުންފެ ދެކުނު ޑިވިޝަންގެ ކޮމާންޑަރު ޗީފް އިންސްޕެކްޓަރު އަހުމަދު ޝިފާން ވިދާޅުވީ ރޭ 7:00 ޖަހާ އެހާކަށްހާ އިރު ހިނގި ހާދިސާ އާ ގުޅިގެން ކާރު ދުއްވަން އިން ހިތަދޫ ކެލާމާގޭ ހުސައިން ހާފިޒް، 19، ފުލުހުންގެ ބެލުމުގެ ދަށަށް ގެންދިޔައީ އެކްސިޑެންޓްވި ސީނުން ކަމަށެވެ.
ޝިފާން ވިދާޅުވީ މި ހާދިސާ އާ ގުޅިގެން ހާފިޒު ރޭ ހުރީ "ޓްރަމަޓައިޒްޑްވެފައ" ކަމަށެވެ.
އެހެންވެ އޭނާ ޑޮކްޓަރަށް ވެސް ދެއްކި ކަމަށާއި މިހާރު އޭނާގެ ހާލު ރަނގަޅު ކަމަށް ޝިފާން ވިދާޅުވި އެވެ.
ހާފިޒު ދުއްވި ކާރުން ޖެހިފައި ހިތަދޫ ސަނީރޯސް އައިމިނަތު ޒީޝާން މަރުވި އިރު، ހާފިޒުގެ އަތުގައި ލައިސަންސް ވެސް އޮތެވެ. ހާފިޒަކީ މި އަހަރު އައްޑު ހައި ސްކޫލްގެ ގްރޭޑް 12 ނިންމި ދަރިވަރެކެވެ.
ޒީޝާން މިއަދު އަސްރު ނަމާދަށް ފަހު ވަނީ ވަޅުލައިފަ އެވެ.