ރާއްޖެއިން ކޮވިޑު ޖެހުނު ދެ ޒުވާނަކަށް ވެންޓިލޭޓަރުގައި ފަރުވާ ދެމުން އަންނަ ކަމަށް އައިޖީއެމްއެޗްގެ އެތެރެހަށީގެ ހާއްސަ ޑޮކްޓަރ މުހައްމަދު އަލީ ވިދާޅުވެއްޖެއެވެ.
ޑރ. މުހައްމަދު އަލީ މިއަދު ކުރެއްވި ޓްވީޓެއްގައި ވިދާޅުވީ އުމުރުން 26 އަހަރާއި 37 އަހަރުގެ މީހެއްގެ އިތުރުން 56 އަހަރުގެ މީހަކަށް ވެންޓިލޭޓަރުގައި ފަރުވާދެމުން އަންނަ ކަމަށެވެ. މި ތިން މީހުންނަކީވެސް ވެކްސިން ޖަހާފައިވާ ބައެއް ނޫންކަމަށް ޑރ. މުހައްމަދު އަލީ ވިދާޅުވިއެވެ.
ޑރ. ވަނީ ވެކްސިން ނުޖަހައި ތިބި ހުރިހާ ފަރާތްތަކުން ވީ އެންމެ އަވަހަކަށް ވެކްސިން ޖެހުމަށް އިލްތިމާސް ކުރައްވާފައެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ އިއްޔެއިން ފެށިގެން މާލޭގެ ތިން ސެންޓަރަކުން ހެނދުނު 9:00-11:00 އަށް ސައިނޯފާމް ވެކްސިންގެ ފުރަތަމަ އަދި ދެ ވަނަ ޑޯޒް ޖަހައިދޭން ފަށާފައެވެ.
އެޗްޕީއޭއިން ބުނީ ވެކްސިން ޖެހި މީހުންނަށް ކޮވިޑުގެ ބޮޑު ވަރު ނުވާކަމަށެވެ.
ރާއްޖޭގައި ހަލުވި ކަމާއި އެކު ކޮވިޑު ފެތުރެމުން އަންނަ އިރު ފާއިތު 24 ގަޑިއިރު ތެރޭ 590 މީހުން ވަނީ ކޮވިޑަށް ޕޮޒިޓިވްވެފައެވެ. ރާއްޖޭގެ ކޮވިޑު އެކްޓިވް ކޭސްގެ ގޮތުގައި 8،640 ކޭސް، އަދި ހޮސްޕިޓަލްތަކުގައި ފަރުވާ ދޭ މީހުންގެ އަދަދުގެ ގޮތުގައި 230އަށް ވަނީ އަރާފައެވެ. ރާއްޖެއިން މި ބަލީގައި 83 މީހުން ވަނީ މަރުވެފައެވެ.