ހިތަދޫ ބަނދަރު ތަރައްޤީކުރުމަށްޓަކައި ބަނދަރު ސަރަހައްދު ހުސް ކުރުމަށް އައްޑޫ ސިޓީ ކައުންސިލުން އަންގައިފިއެވެ.
ކައުންސިލުން މިއަދު ނެރުނު އިއްލާނެއްގައި ބުނީ ހިތަދޫ ބަނދަރު ތަރައްޤީ ކުރުމުގެ މަސައްކަތް އެމް.ޓީ.ޓީ.ސީ.ސީ އާއި ޙަވާލުކޮށް ކުރިޔަށް ގެންދިއުމަށް ހަމަޖެހިފައިވާތީ، ބަނދަރު މަރާމާތު ކުރުމުގެ މަސައްކަތް ނިމެންދެން ކުރީގެ ބައުތޮށިގަނޑު ފެށޭހިސާބުން އުތުރަށް އުޅަނދުފަހަރު ކައިރި ނުކުރުމަށް ވަނީ އެދިފައެވެ.
އަދި މިހާރު އެސަރަޙައްދުގައި ބަނދަރު ކުރެވިފައިވާ އުޅަނދުތައް ނަންގަވައި އަދި އެސަރަޙައްދު ތޮށިގަނޑު ކައިރީ ބެހެއްޓިފައިވާ އެންމެހާ ތަކެތި 2021 މެއި 12 ވަނަ ދުވަހުގެ ނިޔަލަށް ހުސްކޮށް ދެއްވުމަށް ވެސް ކައުންސިލުން ވަނީ އަންގާފައެވެ.
ހިތަދޫ ބަނދަރު ތަރައްޤީ ކުރުމުގެ މަސައްކަތް އެމްޓީސީސީ އާއި ހަވާލުކޮށްފައިވަނީ މިދިޔަ މަހުގެ 1 ވަނަ ދުވަހުއެވެ. މަޝްރޫއުގެ އަމަލީ މަސައްކަތް އެމްޓީސީސީއިން ވަނީ ޖެހިގެން އައި ދުވަހު ފަށާފައެވެ.
ހިތަދޫ ބަނދަރު ތަރައްޤީ ކުރުމުގެ މަޝްރޫއުގެ ދަށުން 234،297 ކިއުބިކް މީޓަރުޣޭ ސަރަހައްދެއްގެ ބަނދަރު ފުންކުރުމާއި، 800 މީޓަރުގެ ސަރަހައްދެއްގައި ބޭރުތޮށި ލުމާއި، 284 މީޓަރުގެ ސަރަހައްދެއްގައި އެއްގަމު ތޮށިލުމާއި، 1420 އަކަ މީޓަރުގެ ސަރަހައްދެއްގައި ޕޭވްމަންޓް ހެދުމާއި، ނެރު ބައްތި ހަރުކުރުމާއި ބަނދަރު ބައްތި ހަރުކުރުމުގެ މަސައްކަތް ހިމެނެއެވެ.
މިނިސްޓްރީ އޮފް ނޭޝަނަލް ޕްލޭނިންގ ހައުސިންގް އެންޑް އިންފްރާސްޓްރަކްޗަރ އިން މި މަޝްރޫއު އެމްޓީސީސީއާ ހަވާލުކޮށްފައިވަނީ 52.43 މިލިއަން ރުފިޔާއަށެވެ. އަދި މި މަޝްރޫއު ނިންމުމަށް ހަމަޖެހިފައިވަނީ 365 ދުވަސްތެރޭގައިއެވެ.