އައްޑޫގެ ރަށްރަށުގެ މަގު ބައްތި ރޭގަނޑު ނުދިއްލޭތީ އައްޑޫ ސިޓީ ކައުންސިލުން ކަންބޮޑުވުން ފާޅުކޮށްފި އެވެ.
ކައުންސިލުން މިކަމާ ކަންބޮޑުވުން ފާޅުކޮށްފައި މި ވަނީ ވަރަށް އަނދިރިކޮށް އަޮތް ހިތަދޫ ލިންކް ރޯޑްގައި ރޭ ކާރަކުން ޖެހި 13 އަހަރުގެ އަންހެން ކުއްޖަކު މަރު ވެސް ވެފައި ވަނިކޮށެވެ.
ކައުންސިލުން ނެރުނު ބަޔާނެއްގައި ބުނީ ވޭތުވެދިޔަ ދެ އަހަރެއްހާ ދުވަހުގެ ތެރޭގައި އައްޑޫގެ ކަރަންޓްގެ ހާލަތު ވަނީ ވަރަށް ބޮޑަށް ދަށަށް ގޮސްފައި ކަމަށެވެ.
"އެނގިވަޑައިގަންނަވާނެ ފަދައިން، އައްޑޫ ސިޓީގައި ބޭއްވި 17 ވަނަ ސާކް ސަމިޓަށް، އައްޑޫގެ ކަރަންޓްގެ ހާލަތު ރަނގަޅުކޮށް ދެއްވުމުގެ ގޮތުން އޭރުގެ ސަރުކާރުން 1.5 މެގަވޮޓްގެ 2 އިންޖީނު އައްޑޫސިޓީއަށް ގެނައެވެ. މިއީ އައްޑޫގެ ރައްޔިތުންނަށް އުފާފާގަތިކަމާއި، ދިރިއުޅުމުގެ ފެންވަރު މަތިކޮށްދެއްވުމުގެ ގޮތުން ސަރުކާރުން ކޮށްދެއްވި ކަމެކެވެ. އައްޑޫގެ ކަރަންޓްގެ ހާލަތު ރަނގަޅު ކުރުމަށް ވޭތުވެދިޔަ ދެ އަހަރު ސަރުކާރުން އެއްވެސް މަސައްކަތެއް ކުރެއްވި ބާއެވެ؟ ސަދަން ޔުޓިލިޓީސް އުވާލައި، މުޅި ރައްޖެއަށް ކަރަންޓްގެ ޚިދުމަތް ދިނުމަށް ސަރުކާރުން އުފެއްދި ފެނަކަ ކޯޕަރޭޝަނުން އައްޑޫގެ ކަރަންޓްގެ ހާލަތު ރަނގަޅު ކުރުމަށް ކުރެއްވީ ކޮންކަމެއްބާއެވެ؟" ބަޔާނުގައިވެ އެވެ. "ފެނަކަ ކޯޕަރޭޝަންގެ ފަރާތުން އައްޑޫސިޓީ ކައުންސިލާ ބައްދަލުކޮށް، ފާއިތުވި ރަމަޟާން މަހާ ހަމައަށް އައްޑޫގެ ކަރަންޓްގެ ހާލަތު ރަނގަޅުކޮށްދެއްވާނެ ކަމުގެ ޔަގީންކަން ދެއްވިއެވެ. ނަމަވެސް އަދާ ހަމައަށްވެސް މިކަމަށް އެދެވޭ ހައްލެއް ނުލިބި، އައްޑޫގެ ބޮޑު ބަޔަކުން އަބަދުހެން ދަނީ ކަރަންޓް ކެނޑެމުންނެވެ. ގޭގެއިންނާއި، ފިހާރަތަކުން ކުއްލިކުއްލި އަށް އެއްވެސް ނޯޓިސްއެއްނެތި ކަރަންޓް ކަނޑާލަމުންދާތީ އެތައް ގެއްލުންތަކެއް ރައްޔިތުންނަށް ދަނީ ލިބެމުންނެވެ. މަގުތައް އަނދިރި ވުމުގެ ސަބަބުން ނުރައްކާތެރި އެކްސިޑެންޓް ހިނގުމުގެ ބިރު ވަނީ ބޮޑު ވެފައެވެ. އެންމެފަހުން ރޭ ޒުވާން އަންހެންކުއްޖަކު މަރުވި އެކްސިޑެންޓް ހިނގި ލިންކް ރޯޑު ސަރަހައްދުގައި ސިޓީ ކައުންސިލުން ހޮޅިބުރިތައް ޖަހާފައި ހުއްޓަސް ކަރަންޓް ކަނޑާލާފައިވާތީ، ހޮޅިބުރިތައް ނުދިއްލެ އެވެ."
ކައުންސިލުން އަދި ބުނީ ފެނަކައިން އައްޑޫގެ ކަރަންޓް ހާލަތު ރަނގަޅު ކުރެވޭނެ ކަމުގެ އުންމީދެއް ނެތް ކަމަށެވެ.
"ޖަނަރޭޓަރުތައް އާކުރުމުގެ ބަދަލުގައި އެކުންފުނިން ކުރަމުންދާ ކަމަކީ، ކަރަންޓް ކަނޑަމުން ދިއުމެވެ. މިއީ ހައްލެއް ނޫނެވެ. އައްޑޫސިޓީ ކައުންސިލުން ފެނަކަ އަށް މި ގޮވާލަނީ، އައްޑޫގެ ކަރަންޓްގެ ހާލަތު ރަނގަޅުކޮށް، މަގުތައް ދިއްލަން ޖަހާފައިވާ ހޮޅިބުރިތައް ދިއްލޭނެ އިންތިޒާމް ހަމަޖައްސުމެވެ." ބަޔާނުގައި ބުނެފައިވެ އެވެ.
ކައުންސިލުން އިތުރަށް ބުނީ މަގުތައް ދިއްލުމަށް ކައުންސިލްގެ އާމްދަނީން މި އަހަރުގެ މިހާތަނަށް 1،921،304.00ރ. ޚަރަދު ކޮށްފައިވާ ކަމަށެވެ.
"މަގުތަކުގެ ރައްކާތެރިކަން ދެމެހެއްްޓުމަށްވެސް އެކިފަހަރުމަތިން ފުލުހުންނާއެކީވެސް އައްޑޫސިޓީ ކައުންސިލުން ވަނީ ބައްދަލުވުންތައް ބާއްވަވާފައެވެ. " ބަޔާނުގައިވެ އެވެ. "އައްޑޫ ސިޓީ ކައުންސިލުން އެދެނީ، އައްޑޫގެ ކަރަންޓްގެ ހާލަތު މިހާރު ހުރި ގޮތުން ލިންކްރޯޑުގައި ހިނގާ މީހުންވެސް މިހާރަށްވުރެ ބޮަޑަށް މަގުތަކަށް ރައްކާތެރިވެގެން ހިނގާބިގާވެ އުޅުމަށެވެ. ދުއްވާ ފަރާތްތަކުންވެސް މަގުތައް ބޭނުންކުރާ ފަރާތްތަކުގެ ރައްކާތެރިކަމަށާއި ގާނުނާއި ގަވާއިދުތަކަށް ހުރުމަތްތެރިކޮށް ހިތައިގެން ދުއްވުމަށްވެސް އިލްތިމާސް ކުރަމެވެ."