ހުޅުމީދޫން ނެގި ރެންޑަމް ސާމްޕަލްތަކުގެ ތެރެއިން 9 މީހަކު ކޮވިޑު-19އަށް ޕޮޒިޓިވްވެފައިވާ އިރު އެރަށުގައި ގަދައަށް ކޮވިޑު ފެތުރޭ ކަމުގެ ބިރު ހީވެެއްޖެއެވެ.
ހުޅުމީދޫ ސިއްހީ މަރުކަޒު ހިންގެވުމާއި ހަވާލުވެ ހުންނެވި އިބްރާހިމް ޒުބައިރު (އިބުރޭ) މިއަދު "އައްޑޫލައިވް"އަށް ވިދާޅުވީ، މިދިޔަ ހަފްތާގައި ހުޅުމީދޫން ނެގި ރެންޑަމް ސާމްޕަލްތަކުގެ ތެރެއިން 9 މީހަކު ކޮވިޑަށ ޕޮޒިޓިވްވެފައިވާ ކަމަށެވެ.
"އަޅުގަނޑުމެން މިކޮޅުން ނެގި ރެންޑަމް ސާމްޕަލްގެ ތެރެއިން 9 މީހަކު މިވަނީ ކޮވިޑަށް ޕޮޒިޓިވްވެފައި. މިއީ ވަރަށް ކަންބޮޑުވާ ކަމެއް، ބަލި މިވަނީ ވަރަށް ބޮޑަށް ފެތުރިފައި" އިބްރޭ ވިދާޅުވިއެވެ.
އިބްރޭ ވިދާޅުވީ ރެންޑަމް ސާމްޕަލްގެ ތެރެއިން ބަޔަކު ޕޮޒިޓިވްވި އިރު އެމީހުންގެ ނަތީޖާ ލިބިފައިވަނީ ހަތަރުވަރަކަށް ދުވަސް ލަހުން ކަމަށެވެ. އަދި އޭގެ ސަބަބުން ޕޮޒިޓިވްވީ މީހުން އެނގުނު އިރު އެމީހުންނާއި ގިނަ ބަޔަކާއި ބައްދަލުވެފައިވާ ކަމަށެވެ.
"ރެންޑަމް ސާމްޕަލްގެ ނަތީޖާ މި ލިބުނީ ތަންކޮޅެއް ލަހުން، އޭރު މި މީހުންނާއި ގިނަ ބަޔަކާއި މި ވަނީ ބައްދަލުވެފައި، އެހެންވެ ކޮންޓެކްޓު ޓްރޭސިން ހެދުން ވަރަށް ދަތި" އިބްރޭ ވިދާޅުވިއެވެ.
ގޭގައި މަޑުކޮށް ކޮންޓެކްޓު މަދު ކުރަން ޖެހޭ!
ހުޅުމީދޫގައި ބަލި ފެތުރިފައިވާ ގޮތުން ބަލި ކޮންޓްރޯލް ކުރުމަށް އެންމެން ގޭގައި މަޑު ކުރުމަކީ މިވަގުތު ވަރަށް މުހިއްމުކަމެކެވެ. ހާއްސަކޮށް މީހުން ގިނައިން އެއްވެ އުޅުމަކީ ބަލި ކޮންޓްރޯލް ކުރުމަށް ހުރަސްތަކާއި ކުރިމަތިވާނެ ކަމެކެވެ.
ހުޅުމީދޫއަށް ކޮވިޑު ފެތުރިފައިވަނީ ހުޅުދޫގައި ދުއްވާ "ނިއުލައިން" ބޯޓުގެ ފަޅުވެރިން ކޮވިޑު-19 އަށް ޕޮޒިޓިވްވުމާއި ގުޅިގެންނެވެ. މިހާތަނަށް ލިބިފައިވާ ނަތީޖާތަކުން ދައްކާ ގޮތުގައި ހުޅުމީދޫގައި ކޮވިޑު ޖެހިފައިވާ 24 މީހުން އެބައުޅެއެވެ. އަދި ކޮންޓެކްޓުންގެ ގޮތުގައި 136 ފަރާތެއް ހިމެނެއެވެ.