މި އަހަރުގެ ކުރިއަށް ހުރި ފިލްމްތަކުގެ ތެރެއިން ބެލުންތެރިން ކެތްތެރި ކަމެއް ނެތި އެންމެ ބޮޑަށް އިންތިޒާރު ކުރަމުން އަންނަ ފިލްމް "ދޫމް 3" ގެ ޓައިޓްލް ލަވަ "ދޫމް މަޗާލޭ" ލަވަ މިއަދު އާންމުކޮށްފި އެވެ.
ފިލްމްގެ ފުރަތަމަ ލަވަ ބެލުންތެރިންނާ ހަމައަށް ގެނެސް ދޭން މިއަދު ބޭއްވި ހަފުލާއެެއްގައި އެ ލަވަ ރިލީޒްކޮށް ދިނީ "ދޫމް 3" ގައި އެންމެ މުހިއްމު ރޯލެއް އަދާ ކުރާ އާމިރް ހާނާއި ކެޓްރީނާ ކެއިފަ އެވެ.
"ދޫމް" ފްރެންޗައިޒްގެ ކުރީގެ ފިލްމްތަކާ އެއްގޮތަށް ޕްރިތަަމް މިއުޒިކް ތައްޔާރުކޮށްފައިވާ "ދޫމް 3" ގެ ޓައިޓްލް ލަވަ ކިޔާފައި ވަނީ އަދިތީ ސިންގް ޝަރްމާ އެވެ. ލަވައިގެ ލިރިކްސް ތައްޔާރުކޮށް ދީފައި ވަނީ ސަމީރު އަންޖާން އެވެ.
"ދޫމް މަޗާލޭ" ލަވައިގައި މުޅިން ފެނިގެން ދަނީ ބެކް ޑާންސަރުންނާ އެކު ކެޓްރީނާ އެވެ.
ޑިސެމްބަރު މަހުގެ 20 ވަނަ ދުވަހު ސިނަމާތަކަށް އަންނަ "ދޫމް 3" ގައި އަބިޝެކް ބައްޗަން އާއި އުދޭ ޗޯޕްޅާ ވެސް ކުރީގެ ދެ ފިލްމުން އެ ދެ މީހުން ފެނިގެން ދިޔަ ކެރެކްޓާތަކުން ފެނިގެން ދާނެ އެވެ.
ބެލެވޭ ގޮތުގައި ޔާޝްރާޖް ފިލްމްސް (ވައިއާރްއެފް) ގެ "ދޫމް 3" އަކީ ވެސް ބޮލީވުޑްގައި މި އަހަރު އާ ރެކޯޑްތަކެއް ހަދާނެ ފިލްމެކެވެ.
މި ފިލްމްގެ ފުރަތަމަ ޓްރެއިލާ މިދިޔަ މަހުގެ 31 ވަނަ ދުވަހު ވަނީ އާންމުކޮށްފަ އެވެ.