އެމްއެމްޕީއާރްސީގެ ހިޔާނާތުގެ ފައިސާ ލިބުނު މީހުންކަމަށް ބުނާ ލިސްޓުގައި ރައީސް އަބްދުﷲ ޔާމީންގެ ސަރުކާރުގެ އިކޮނޮމިކް މިނިސްޓަރު އަދި މިހާރު މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދުގެ ނަން ހިމެނޭކަން ހާމަވެއްޖެއެވެ.
އެމްއެމްޕީއާރްސީގެ ހިޔާނާތުގެ ފައިސާ ލިބުނު މީހުންކަމަށް ބުނާ ލިސްޓުގައިވާ ގޮތުން ސައީދުއަށް ޖުމުލަ 8،308،400 (އަށް މިލިއަން ތިން ލައްކަ އަށްޑިހަހާސް ހަތަރު ސަތޭކަ) ރުފިޔާ ލިބެފައިވެއެވެ.
އެއީ ސައީދު ޕާޓީ ބަދަލުކުރުމަށް ދީފައިވާކަމަށް އަދީބު ބުނާ 8 މިލިއަން ރުފިޔާއަކާއި 2015 ވަނަ އަހަރު ސައީދު ދިރިއުޅޭ ގެ ކައިރިން 20،000 ޑޮލަރު ދިން ކަމަށް މުހައްމަދު ހުސައިން (އޮއިއްޓޭ) ބުނެފައިވާ ބުނުމެކެވެ.
މިފަހުން ސައީދު ވަނީ އުނި އިތުރު ނުގެނެސް އެމްއެމްޕީއާރްސީގެ ހިޔާނާތުގެ ލިސްޓު އާންމުކުރަންޖެހޭ ކަމަށް ވިދާޅުވެފައެވެ. ސައީދު ކުރެއްވި ޓްވީޓެއްގައި ވިދާޅުވީ އުނި އިތުރު ނުގެނެސް އެމްއެމްޕީއާރްސީގެ ލިސްޓު އާންމުކުރަންޖެހޭ ކަމަށާއި ބޭނުން ނަމެއް އިތުރުކޮށް އަދި އުނިކޮށް ހެދުން އެއީ ރައްޔިތުން ބަލައިގަންނާނެ ކަމެއް ނޫން ކަމަށެވެ.
އެމްއެމްޕީއާރްސީގެ ހިޔާނާތަކީ މިފަހުން ރާއްޖޭގައި ހިންގި އެންމެ ބޮޑު ހިޔާނާތެވެ. އެ މައްސަލަ ތަހުގީގު ކޮށް އެ ފައިސާގައި ޖެހިފައިވާ މީހުން އިންސާފުގެ ކުރިމައްޗަށް ގެނައުމަކީ މިސަރުކާރުން ވެފައިވާ ވައުދެކެވެ.
އެމްއެމްޕީއާރްސީގެ ހިޔާނާތުގެ ފައިސާ ލިބުނު މީހުންކަމަށް ބުނާ ލިސްޓުގައި އެމްޑީޕީގެ މިހާރުގެ ޗެއާޕާސަން ހަސަން ލަތީފާއި ނައިބު ރައީސް މުހައްމަދު ޝިފާޒްގެ އިތުރުން ޕާލިމެންޓަރީ ގްރޫމްގެ ލީޑަރު އަލީ އާޒިމްގެ ނަންވެސް ހިމެނިފައިވެއެވެ.