އެމްއެމްޕީއާރްސީގެ ހިޔާނާތުގެ ފައިސާ ޕީޖީ ހުސައިން ޝަމީމަށް ލިބުނު ކަމަށް ބުނާ މައްސަލައިގައި ޕީޖީ އޮފީހުން ޝަމީމްގެ ދިފާއުގައި ވާހަކަ ދައްކައިފިއެވެ.
ޕީޖީ ޝަމީމަށް އެމްއެމްޕީއާރްސީގެ ހިޔާނާތުގެ ފައިސާ ލިބުނުކަމަށް ތުހުމަތުކުރުމުން ޕީޖީ ޝަމީމް ވަނީ އެ ވާހަކަތަކަކީ ދޮގެއްކަމަށް ބުނެފައެވެ. އަދި އެއީ "ފޭކް ނިއުސް" ކަމަށްވެސް ބުނެފައިވެއެވެ.
އެކަމާއި ގުޅިގެން ޕީޖީ އޮފީހުން ޕީޖީ ޝަމީމްގެ ދިފާއުގައި ބުނެފައިވަނީ އެމްއެމްޕީއާރްސީ ހިޔާނާތާ ގުޅުންހުރި ފައިސާ ޕްރޮސިކިއުޓަރ ޖެނެރަަލްއަށް ލިބިވަޑައިގެންނެވި ކަމަށް ބަޔާންކޮށް އޮންލައިން ނޫހެއްގައި ލިޔެފައިވާ ވާހަކަތަކަކީ ހަޤީޤަތާ ހިލާފު، ކަނޑައެޅިގެން ދޮގު ވާހަކަތަކެއް ކަމަށެވެ. އެމްއެމްޕީއާރްސީގެ ހިޔާނާތާ ގުޅުންހުރި އެއްވެސް ފައިސާއެއް އެއްވެސް އިރެއްގައި ޕްރޮސިކިއުޓަރ ޖެނެރަލް ހުސެއިން ޝަމީމަށް ލިބިވަޑައިގެންފައި ނުވާކަމުގެ ޔާޤީންކަން އަރުވާ ކަމަށް ވެސް ޕީޖީގެ މީޑިއާ އޮފިޝަލް ވިދާޅުވިއެވެ.
ޕީޖީގެ މީޑިއާ އޮފިޝަލްގެ މި މެސެޖާއެކު ނޫސްވެރިން ވަނީ ޝަމީމްގެ ދިފާއުގައި ޕީޖީ އޮފީހުން ވާހަކަ ދެއްކި ސަބަބާމެދު ސުވާލުކޮށްފައެވެ. އެގޮތުން ޝަމީމް ދިފާއީ ވަކީލެއްގެ ގޮތުގައި މަސައްކަތްކުރިއިރު ކުރިކަމަށްބުނާ ކަމަކާ ގުޅިގެން ދެކެވޭ ވާހަކަތަކަށް ޕީޖީ އޮފީހުން ޖަވާބު ދެނީ ކޮންހައިސިއްޔަތަކުންތޯވެސް ސުވާލު ކޮށްފައިވެއެވެ.
ޕީޖީ އޮފީހުން ޕީޖީ ޝަމީމްގެ ދިފާއުގައި ވާހަކަދެއްކުމުން އެކަމުގައި ނޫސްވެރިން ގިނަ ސުވާލުތަކެއް އުފެއްދުމާއި ގުޅިގެން ޕީޖީގެ މީޑިއާ އޮފިޝަލް ވިދާޅުވީ "ފޭކް ނިއުސް" ފެތުރުމުން ޕީޖީ އަދި ޕީޖީ އޮފީހުގެ އިންޓެގްރިޓީއާމެދު ސުވާލު އުފެދޭނެކަމަށެވެ. އަދި ޕީޖީ އޮފީހުގެ ސޮޕޯކްސްޕާސަންގެ ހައިސިއްޔަތުން އެ ވާހަކަތައް ދޮގުކުރަން ޖެހޭކަމަށެވެ. އަދި ޕީޖީގެ ދިފާއުގައި ޕީޖީ އޮފީހުން ވާހަކަ ދައްކާ ސަބަބު ޤާނޫނުއަސާސީގެ 220 ވަނަ މާއްދާއިން ފެށިގެން ކިޔުމުން އެނގޭނެކަމަށާއި އަދި ޕްރޮސިކިއުޓާ ޖެނެރަލްގެ ޤާނޫނުންވެސް އެކަން އެނގޭނެކަމަށެވެ.