އެމްއެމްޕީއާރްސީގެ ހިޔާނާތުގެ މައްސަލައިގައި އެސެޓް ރިކަވަރީ ކޮމިޝަނުން ތަހުގީގު ކުރާ ފަރާތްތަކުގެ ނަން ހިމެނޭ ލިސްޓް އާންމު ކުރުމަށް އަދި ހިޔާނާތުގެ ފައިސާ ލިބުނު ފަރާތްތަކުގެ ތެރެއިން ދައުލަތުގެ އެކި މަގާމުތަކުގައި ތިބި ފަރާތްތައް މަގާމުން ދުރުކުރުމަށް އެ މައްސަލަ ދިރާސާކުރި ޖުޑިޝަރީ ކޮމިޓީއާއި ސަލާމަތީ ހިދުމަތްތަކާ ބެހޭ ކޮމިޓީގެ ޖޮއިންޓް ކޮމިޓީން ފާސްކޮށްފިއެވެ.
ޖޮއިންޓް ކޮމިޓީން މިގޮތަށް ފާސްކޮށްފައިވަނީ ސަބް ކޮމިޓީގެ ރިޕޯޓް ދިރާސާކޮށް ފާސްކުރުމަށް މިއަދު ބޭއްވި ކޮމިޓީ ބައްދަލުވުމުގައި ބައިވެރިވި ހުރިހާ މެމްބަރުންގެ ވޯޓުންނެވެ.
އެ މައްސަލަ ދިރާސާކުރުމަށް ފަހު ކޮމިޓީން އެކުަލވާލި ރިޕޯޓްގައި ބުނެފައިވަނީ އެމްއެމްޕީއާރްސީގެ ހިޔާނާތާ ގުޅޭ މައްސަލާގައި ހިމެނޭ ދައުލަތުގެ މުވައްޒަފުންގެ ގޮތުގައި ތިބި މީހުންގެ މައުލޫމާތު އެނގުމަކީ އެންމެ މަސްލަހަތު ބޮޑު ގޮތް ކަމުގައި ދެކޭކަމަށެވެ.
ކޮމިޓީން ވަނީ އެސެޓް ރިކަވަރީ ކޮމިޝަނުން މިހާރު ތަހުގީގުކުރާ 281 މީހުންގެ ނަން ހިމެނޭ ލިސްޓާއި އެމްއެމްޕީއާރްސީގެ ހިޔާނާތުގެ ފައިސާ ލިބިފައިވާ ދައުލަތުގެ އެކި މަގާމުތަކުގައި ތިބި 119 މީހެއްގެ ނަން ހިމެނޭ ލިސްޓް އާންމުކުރުމަށްވެސް ފާސްކޮށްފައެވެ
މައްސަލަ ދިރާސާކުރުމަށްފަހު ކޮމިޓީން ހުށަހަޅާ ކަންކަމުގެ ގޮތުގައި ބުނެފައިވަނީ އެމްއެމްޕީއާރްސީގެ ހިޔާނާތުގެ މައްސަލައިގެ ތަހުގީގު ލަސްވެފައިވާކަމާއި، އެހެންކަމުން ތަހުގީގު އަވަސް ކުރުމަށް އެސެޓް ރިކަވަރީ ކޮމިޝަންގައި ދެންނެވުމަށެވެ. މީގެ އިތުރުން ހިޔާނާތުގެ ފައިސާ އަނބުރާ ހޯދުމުގެ މަސައްކަތް ކުރިއަށް ގެންދިއުމަށް ސަރުކާރުގެ ކަމާގުޅޭ އިދާރާތަކަށް ދެންނެވުމަށްވެސް ކޮމިޓީން ހުށަހަޅާފައިވެއެވެ. އަދި ދައުލަތުގެ މަގާމުތަކުގެ ތެރެއިން އެވަގުތަކު ހުރި މަގާމުން ވަކިކުރެވޭ ފަރާތްތައް ވަކިކުރުމާއި އިންތިހާބީ މަގާމެއްގައި ތިބި މީހުން ވަކިކުރެވޭނީ އަމިއްލަ އަށް އިސްތިއުފާ ދިނުމުން، ނުވަތަ ކޯޓަކުން ހުކުމެއް ކޮށްގެންކަމަށް ވާތީ އެމައްސަލަތައް އަވަހަށް ދިރާސާކުރުމަށްވެސް ކޮމިޓީން ހުށަހަޅާ ކަމެއްގެ ގޮތުގައިވެއެވެ.