އެމްއެމްޕީއާރްސީ ހިޔާނާތުގެ ފައިސާ ލިބުނު މީހުންގެ ތެރެއިން 119 މީހުންނަކީ ދައުލަތުގެ އެކި މަގާމުތަކުގައި ތިބި މީހުންކަމަށް އެމްއެމްޕީއާރްސީގެ ހިޔާނާތުގެ ލިސްޓް ދިރާސާކުރާ ޖުޑިޝަރީ ކޮމިޓީއާއި ސަލާމަތީ ހިދުމަތްތަކާބެހޭ ކޮމިޓީގެ ޖޮއިންޓް ކޮމިޓީން ހާމަކޮށްފިއެވެ.
މިހާރު ކުރިއަށްދާ ކޮމިޓީ ބައްދަލުވުމުގައި އެ މައްސަލަ ދިރާސާކުރި ސަބްކޮމިޓީގެ ރިޕޯޓް ޖޮއިންޓް ކޮމިޓީއަށް އިއްވާފައިވާއިރު އެ ރިޕޯޓާއެކު އެސެޓް ރިކަވަރީ ކޮމިޝަނުން ހިއްސާކުރި ހިޔާނާތުގެ ފައިސާ ލިބި ތަހުގީގު ކުރަމުންއަންނަ މީހުންގެ ލިސްޓުވެސް ވަނީ ހިމަނާފައެވެ.
ސަބްކޮމިޓީގެ ރިޕޯޓް އިއްވަވަމުން ކޮމިޓީ މުގައްރިރު އިމްތިޔާޒް ފަހުމީ ވިދާޅުވީ އެސެޓް ރިކަވަރީ ކޮމިޝަނުން މިހާރު ތަހުގީގުކުރާ 281 މީހުންގެ ނަން ހިމެނޭ ލިސްޓެއް އެސެޓް ރިކަވަރީ ކޮމިޝަންގެ ތައްގަނޑާއެކު ހުށަހަޅާފައިވާކަމަށާއި، އަދި އެމްއެމްޕީއާރްސީގެ ހިޔާނާތުގެ ފައިސާ ލިބިފައިވާ ދައުލަތުގެ އެކި މަގާމުތަކުގައި ތިބި 119 މީހެއްގެ ނަން ހިމެނޭ ލިސްޓެއް އެސެޓް ރިކަވަރީ ކޮމިޝަންގެ ތައްގަނޑާއެކު ހުށަހަޅާފައިވާކަމަށެވެ.
ދައުލަތުގެ މަގާމުތަކުގައި ތިބި 119 މީހަކަށް އެމްއެމްޕީއާރްސީ ހިޔާނާތުގެ ފައިސާ ލިބުނުކަމަށް ކުރާ ތުހުމަތުގައި ކޮމިޓީން ވަނީ ދައުލަތުގެ މަގާމުތަކުގެ ތެރެއިން އެވަގުތަކު ހުރި މަގާމުން ވަކިކުރެވޭ ފަރާތްތައް ވަކިކުރުމާއި އިންތިހާބީ މަގާމެއްގައި ތިބި މީހުން ވަކިކުރެވޭނީ އަމިއްލަ އަށް އިސްތިއުފާ ދިނުމުން، ނުވަތަ ކޯޓަކުން ހުކުމެއް ކޮށްގެންކަމަށް ވާތީ އެމައްސަލަތައް އަވަހަށް ދިރާސާކުރުމަށްވެސް ކޮމިޓީން ހުށަހަޅާ ކަމެއްގެ ގޮތުގައި ވަނީ ފާހަގަކޮށްފައެވެ.