އެމްއެމްޕީއާރްސީގެ ހިޔާނާތުގެ ފައިސާ ލިބުނު މީހުންގެ ލިސްޓް ކުޑަ ވަގުތުކޮޅެއްގެ ތެރޭގައި ރައްޔިތުންގެ މަޖިލީހުން އާންމު ކުރާނެއެވެ.
އެ ލިސްޓް އާންމު ކުރުމަށް ފާސްކޮށްފައިވަނީ އެމްއެމްޕީއާރްސީގެ ހިޔާނާތުގެ މައްސަލަ ދިރާސާކުރި ޖުޑިޝަރީ ކޮމިޓީއާއި ސަލާމަތީ ހިދުމަތްތަކާ ބެހޭ ކޮމިޓީގެ ޖޮއިންޓް ކޮމިޓީން މީގެ ކުޑަ ވަގުތުކޮޅެއް ކުރިންނެވެ.
ހިޔާނާތުގެ ފައިސާ ލިބުނު މީހުންގެ ނަންތައް ހިމެނޭ ލިސްޓާއި އެކު ޖޮއިންޓް ކޮމިޓީން އެ ކޮމިޓީގެ ރިޕޯޓް ފާސްކުރިއިރު، މަޖިލީހުގެ ވެބްސައިޓުގައި ކުޑަ ވަގުތުކޮޅެއްގެ ތެރޭގައި އެ ލިސްޓް އާންމު ކުރާނެ ކަމަށްވެސް ކޮމިޓީން މައުލޫމާތުދީފައިވެއެވެ.
އެ ރިޕޯޓްގެ ޖަދުވަރު 1 ގައި އޮންނާނީ އެސެޓް ރިކަވަރީ ކޮމިޝަނުން މިހާރު ތަހުގީގުކުރާ 281 މީހުންގެ ނަން ހިމެނޭ ލިސްޓު އެސެޓް ރިކަވަރީ ކޮމިޝަންގެ ތައްގަނޑާއެކުއެވެ. އަދި އެ ރިޕޯޓްގެ ޖަދުވަލު 2 ގައި އޮންނާނީ އެމްއެމްޕީއާރްސީގެ ހިޔާނާތުގެ ފައިސާ ލިބިފައިވާ ދައުލަތުގެ އެކި މަގާމުތަކުގައި ތިބި 119 މީހެއްގެ ނަން ހިމެނޭ ލިސްޓް އެސެޓް ރިކަވަރީ ކޮމިޝަންގެ ތައްގަނޑާއެކުއެވެ.
ހިޔާނާތުގެ ފައިސާ ލިބުނު މީހުންގެ ނަންތައް ހިމެނޭ ލިސްޓް އާންމު ކުރުމަށް ޖުޑިޝަރީ ކޮމިޓީއާއި ސަލާމަތީ ހިދުމަތްތަކާ ބެހޭ ކޮމިޓީގެ ޖޮއިންޓް ކޮމިޓީން ފާސްކޮށްފައިވާއިރު، ރޭގެ ވަގުތެއްގައި ވަނީ އެ ލިސްޓް ކަމަށްބުނެ ލިސްޓެއްވެސް ސޯޝަލް މީޑިއާގައި އާންމުކޮށްފައެވެ. އެހެންނަމަވެސް ކޮމިޓީގެ މެމްބަރުން ބުނެފައިވަނި އެ ފޭކް ލިސްޓް އާންމުކުރީ ކޮމިޓީގައި އޮތް ލިސްޓާއި މެދު އިތުބާރު ގެއްލުވާލުމަށ ްކަމަށެވެ.