އެމްއެމްޕީއާރްސީގެ ހިޔާނާތުގެ ފައިސާ ލިބުނު މީހުންގެ ލިސްޓުގައި އޮޑިޓަރ ޖެނެރަލް ހަސަން ޒިޔަތުގެ ނަން ހިމެނިފައިވާކަން އެނގިއްޖެއެވެ. އޮޑިޓަރ ޖެނެރަލް ޒިޔަތަކީ ހިޔާނާތުގެ ކަންކަމުގައި އެންމެ އިސްކޮށް އުޅުނު އަދި ހިޔާނާތަށް އިއުތިރާފްވެފައިވާ އަބްދުﷲ ޒިޔަތުގެ ކޮށްކޮއެވެ.
އޮޑިޓަރ ޖެނެރަލް ހަސަން ޒިޔަތު ވަނީ 18 ވަނަ ރައްޔިތުންގެ މަޖިލީޙުގެ އިންތިހާބުގައި ހުޅު ހެންވޭރު ދާއިރާއަށް ޕީޕީއެމްގެ ޓިކެޓުގައި ވާދަވެސް ކޮށްފައެވެ.
ހިޔާނާތުގެ ފައިސާ ލިބުނު މީހުންގެ ލިސްޓް އާންމުކުރުމަށް ޖުޑިޝަރީ ކޮމިޓީއާއި ސަލާމަތީ ހިދުމަތްތަކާ ބެހޭ ކޮމިޓީގެ ޖޮއިންޓް ކޮމިޓީން ވަނީ ފާސްކޮށްފައެވެ. މައުލޫމާތު ލިބިފައިވާ ގޮތުގައި މި ލިސްޓުގައި ޒިޔަތުގެ ނަން ހިމެނެއެވެ.
ހިޔާނާތުގެ ފައިސާ ލިބުނު މީހުންގެ ނަންތައް ހިމެނޭ ލިސްޓާއި އެކު ޖޮއިންޓް ކޮމިޓީން އެ ކޮމިޓީގެ ރިޕޯޓް ފާސްކުރިއިރު، މަޖިލީހުގެ ވެބްސައިޓުގައި ކުޑަ ވަގުތުކޮޅެއްގެ ތެރޭގައި އެ ލިސްޓް އާންމު ކުރާނެ ކަމަށްވެސް ކޮމިޓީން މައުލޫމާތުދީފައިވެއެވެ.
އެ ރިޕޯޓްގެ ޖަދުވަރު 1 ގައި އޮންނާނީ އެސެޓް ރިކަވަރީ ކޮމިޝަނުން މިހާރު ތަހުގީގުކުރާ 281 މީހުންގެ ނަން ހިމެނޭ ލިސްޓު އެސެޓް ރިކަވަރީ ކޮމިޝަންގެ ތައްގަނޑާއެކުއެވެ. އަދި އެ ރިޕޯޓްގެ ޖަދުވަލު 2 ގައި އޮންނާނީ އެމްއެމްޕީއާރްސީގެ ހިޔާނާތުގެ ފައިސާ ލިބިފައިވާ ދައުލަތުގެ އެކި މަގާމުތަކުގައި ތިބި 119 މީހެއްގެ ނަން ހިމެނޭ ލިސްޓް އެސެޓް ރިކަވަރީ ކޮމިޝަންގެ ތައްގަނޑާއެކުއެވެ.