ބަނގުރާ ބުއިމުގެ ތުހުމަތުގައި މި މަހުގެ ހަ ވަނަ ދުވަހުގެ ރޭ ފުލުހުން ހައްޔަރު ކުރި ސ. ފޭދޫ ކައުންސިލަރު އަހުމަދު މިރުޒާދު (މިރާ) މިއަދު ގޭ ބަންދުން ވެސް ދޫކޮށްލައިފި އެވެ.
އޭނާ ގޭ ބަންދަށް ބަދަލު ކުރީ ހަ ވަނަ ދުވަހު ކޯޓަށް ގެންގޮސް، ބަންދުގެ މުއްދަތަށް 10 ދުވަސް ކޯޓުން ދީފައި ވަނިކޮށެވެ.
ގޭ ބަންދުން ދޫކޮށްލުމާ ގުޅިގެން މިރާ އިއްޔެ ވަނީ މިނިވަންކަމާ އެކު ވޯޓް ވެސް ލައިފަ އެވެ. މި މަހުގެ 9 ވަނަ ދުވަހު ބޭއްވި އިންތިހާބުގެ ފުރަތަމަ ބުރުގައި އޭނާ ވޯޓްލީ ފުލުހުންގެ ބެލުމުގެ ދަށުގައި ހުރެގެންނެވެ.
މިރާ ދޫކޮށްލުމާ ގުޅިގެން އިއްޔެ ވޯޓް ގުނި އިރު ވެސް ފޭދޫ ސްކޫލްގައި ހުރި ވޯޓް ފޮށިތަކުގެ ކައިރީގައި އޭނާ ހަރަކާތްތެރިވެފައިވެ އެވެ.
ގަމުގެ އީކްއޭޓާ ވިލެޖްގައި ބަނގުރާ ބުއިމުގެ ތުހުމަތުގައި މިރާ އާ އެކު ފުލުހުން ހައްޔަރު ކުރި އަނެއް ދެ މީހުން ވެސް ވަނީ ގޭ ބަންދުން ދޫކޮށްލައިފަ އެވެ.
އެއީ ފޭދޫ ހިޔާލާގޭ އަހުމަދު މިންތާޒު (މިންތާ) އާއި ހިތަދޫ ސަހަރާގޭ އަލީ މޫސާ ދީދީ އެވެ.
އެ ތިން މީހުން ހައްޔަރުކޮށް، ކުޑަކަމުދާ ތަކެތި ޓެސްޓް ކުރި އިރު، ބަނގުރާ ބޮއެގެން ތިބި ކަމަށް ޕޮޒިޓިވްވެފައިވާ ކަމަށް ވެސް ފުލުހުން ބުންޏެވެ.