ރާއްޖެއަށް މިހާރު ކުރަމުންދާ ވިއްސާރާގައި ހއ. ހޯރަފުއްޓަށް އުދައަރައި ބޮޑެތި ގެއްލުންތަކެއް ވެއްޖެއެވެ.
ހޯރަފުށީ ކައުންސިލްގެ ރައީސް މުހައްމަދު ވަހީދު ވިދާޅުވީ އެރަށައް އުދައަރައި ގެއްލުން ވެފައިވާ ކަމަށެވެ.
އެގޮތުން އެރަށު އެއާޕޯޓަށްދާން އޮންނަ މަގާއި، ސިއްހީ މަރުކަޒު ހުންނަ މަގަށް ވަރަށް ބޮޑަށް އުދަ އަރާފައިވާކަމަށެވެ. މީގެ އިތުރުންވެސް ގަދަ ވަޔާއި އެކު އެއާޕޯޓުގެ ޓާމިނަލްގެ އެއް ބިއްގަޑުވެއްޓިފައިވާ ކަމަށް ވަހީދު ވިދާޅުވިއެވެ.
ރާއްޖެއަށް ކުރަމުންދާ ވިއްސާރާގައި ރާއްޖޭގެ އުތުރުން ވ އަތޮޅުން ފެށިގެން ހއ. އަތޮޅާއި ހަމައަށް ޔެލޯ އެލާޓުވަނީ ނެރެފައެވެ. އަދި ގަޑިއަކު 55 މޭލަށް ވައިގަދަވާނެ ކަމަށާއި ކަނޑުތައް ވެސް ގަދަވާނެ ކަމަށް ލަފާކުރެ އެވެ.
މެޓު އޮފީހުން ބުނީ ރާއްޖެއަށް ކުރަމުންދާ ވިއްސާރައަކީ އަރަބި ކަނޑުގައި އުފެދިފައިވާ ބާރުގަދަ ކޮޅިގަނޑެއްގެ ސަބަބުން ކުރަމުން އަންނަ ވިއްސާރައެއްކަމަށެވެ. އަދި ކޮޅިގަޑު ޠޫފާނަކަށް ބަދަލުވެދާނެ ކަމުގެ ފުރުސަތު ބޮޑުކަމަށް މެޓުން ވަނީ ބުނެފައެވެ.