މުސާރަ ނުދީގެން އެމްވީކޭ ދޯނި ފަހަރުގެ ކެޕްޓަނުންނާއި ފަޅުވެރިން ފެށި ހަޅުތާލަށް ފަހު ހުއްޓާލާފައިވާ ހުޅުމީދޫ އާއި ފޭދޫ ދެމެދުގެ ކަނޑު ދަތުރު ފަތުރުތައް މިއަދު އަލުން ފަށާނެކަމަށް އެމްވީކޭއިން ބުނެފިއެވެ.
މިދިޔަ މަހުގެ 17 ވަނަ ދުވަހުން ފެށިގެން ހުއްޓާލާފައިވާ މިޚިދްމަތް މިއަދު އަލުން ފަށާއިރު މުސާރައިގެ މައްސަލަ ހައްލު ކުރެވިފައިވާ ކަމަށް އެމްވީކޭއިން ބުންޏެވެ.
އެމްވީކޭއިން ބުނީ އެކުންފުނީގެ މުވައްޒަފުންނަށް މުސާރަ ކަނޑައެޅިފައިވާ މުއްދަތަށް ނުދެވި ލަސްވެފައިވާނީ ކުންފުނީގެ މާލީހާލަތު މިވަގުތު ދަށްވެފައިވުމުގެ ސަބަބުންކަމަށެވެ. އެކަން މުވައްޒަފުންނަށް އެކިފަހަރުމަތީން އަންގާފައިވާނޭކަމަށް ވެސް އެމްވީކޭއިން ބުންޏެވެ.
އެމްވީކޭއިން ބުނީ މުވައްޒަފުން ހަޅުތާލުކޮށް ދަތުރުތައް ހުއްޓާލުމުން އެކުންފުންޏަށް ވަރަށްބޮޑެތި މާލީ ގެއްލުންތަކެއް ވެފައިވާކަމަށެވެ.
އެވީކޭގެ ދޯނިތަކުގެ ފަޅުވެރީން މުސާރަނުދީގެންކަމަށްބުނެ ދޯނި ދަތުރުތައް ހުއްޓާލުމާއި ގުޅިގެން އެކުންފުންޏާއި ޝަންގްރިއްލާ އާއި ދެމެދު ވެފައިވާ އެއްބަސްވުން ވަނީ އުވަލާފައިއެވެ. އަދި ޝަންގްރިއްލާގެ ދަތުރުތައްވަނީ އެހެން ބަޔަކާއި ހަވާލް ކޮށްފައިއެވެ.
އެމްވީކޭއިން ދަތުރުތައް ހުއްޓާލުމާއި ގުޅިގެން ހުޅުމީދޫން ގަމާއި ހިތަދޫއަށް ދަތުރުތައް ނުކުރެވި ހުއްޓިފައިވަނިކޮށް މިދިޔަ މަހުގެ 23 ވަނަ ދުވަހު ގަން އެއަރޕޯރޓްސް ކޮމްޕެނީންވަނީ ހުޅުދުއާއި ފޭދޫއާއިދެމެދު ދޯނިދަތުރުތައް ބާއްވަން ފަށާފައެވެ. މިގޮތުން ހުކުރުދުވަސް ފިޔަވައި ކޮންމެ ދުވަހަކު ހެދުނު 7.00 ން ހުޅުދޫން ފޭދުއަށް އަދި ހަވީރު 4.00 ން ފޭދުން ހުޅުދޫއަށް ވަނީ ދަތުރު ބާއްވާފައިއެވެ.
އެމްވީކޭއިން ބުނީ މިއަދުން ފެށިގެން މީދޫއާއި ފޭދޫއާއި ދެމެދު ކުރީންވެސް ދަތުރުތައް ބާއްވަމުން އައިގޮތަށް ދަތުރުތައް ބާއްވަމުން އަންނާނެކަމަށާ އެކުންފުނިން ކުރިން ދެމުންގެންދިއަ ބަސް ދަތުރު ތައްވެސް ފެށިފައިވާނެ ކަމަށެވެ.