އައްޑޫ ސިޓީގެ ހުރިހާ މިސްކިތެއްގައި ޖަމާޢަތުގައި ނަމާދު ކުރުން ހުއްޓާލުމަށް މިނިސްޓްރީ އޮފް އިސްލާމިކް އެފެއާޒުން އަންގާފައިވާ ކަމަށް އައްޑޫ އިމަޖެންސީ އޮޕަރޭޝަން ސެންޓަރުން ހާމަކޮށްފިއެވެ.
އެ ގޮތުން ޖަމާޢަތުގައި ނަމާދު ކުރުން ހުއްޓާލަން އަންގަވާފައިވަނީ 15 މެއި 2021 ވާ ހޮނިހިރު ދުވަހުގެ ފަތިސް ނަމާދުން ފެށިގެންނެވެ.
އައްޑޫ ސިޓީން އިތުރު 15 މީހަކު ކޮވިޑް-19 އަށް އިއްޔެ ވަނީ ޕޮޒިޓިވްވެފައެވެ. އައްޑޫ ހޮސްޕިޓަލުން ބުނީ މިއަދު ހަވީރު 6 ޖެހުމާއި ހަމައަށް ހުޅުދޫން 11 ކޭސް، މީދޫން ދެ ކޭސް، ހިތަދޫން އެއް ކޭސް އަދި ފޭދޫން އެއް ކޭސް ފެނިފައިވާ ކަމަށެވެ.
އެއާއެކު ހިތަދޫގައި ކޮވިޑްގެ އެކްޓިވް 27 ކޭސް، ފޭދޫގައި ހަ ކޭސް، ހުޅުދޫގައި 52 ކޭސް އަދި މީދޫގައި 11 ކޭސް އުޅޭ ކަމަށް ހޮސްޕިޓަލުން ބުނެއެވެ. އެއާއެކު އައްޑޫ އިން ޕޮޒިޓިވްވި މީހުންގެ ޖުމްލަ އަދަދު މިހާރު 98 އަށް ވަނީ އަރާފައެވެ. ބަލިން އެކަކު ރަނގަޅު ވެފައިވާއިރު، އެކަކަށް އަންނަނީ ހޮސްޕިޓަލުގައި ފަރުވާ ދެމުންނެވެ.
ކޮވިޑް ކޭސްތައް ފެންނަމުންދާތީ އެޗްޕީއޭ އިން ވަނީ ހަތް ދުވަހުގެ މުއްދަތަށް އައްޑޫގައި އަޅާފައިވާ ފިޔަވަޅުތައް ވަރުގަދަކުރަން ނިންމާފައެވެ. އެގޮތުން ހަވީރު 6 އިން ފެށިގެން ފަތިހު 4:00 އަށް، އެއްގަމު އުޅަނދުފަހަރު ދުއްވުމާއި، މަގުމައްޗާއި އާންމު ތަންތަނަށް މީހުން ނިކުތުން މަނާކޮށްފައެވެ.