އިޒްރޭލުން އެމީހުން ފަލަސްތީނަށް ދެމުންގެންދާ ހަމަލާ ވަރުގަދަކޮށް، ހަމާސްގެ ސިޔާސީ ލީޑަރު ޔަހްޔާ ސިންވާރްގެ ގެއަށް ވައިގެ މަގުން ބޮމުގެ ހަމަލާދީފިއެވެ.
އިޒްރޭލުން ދީފައިވާ މި ހަމަލާގައި ޔަހްޔާ އަދި އޭނާގެ އާއިލާގެ އެއްވެސް ބަޔަކު މަރުވިކަމެއް ނުވަތަ ޒަޚަމްވި ވާހަކައެއް އެއްވެސް ރިޕޯޓަކުން ފެންނާކަށް ނެތެވެ. އެހެން ނަމަވެސް މިއަދު ދިން ހަމަލާ ތަކުގައި މިހާތަނަށް 33 މީހުން މަރުވެފައިވާ ކަމަށް ބީބީސީއިން ރިޕޯޓް ކޮށްފައިވެއެވެ.
މިދިޔަ ހަފްތާގެ ހޯމަ ދުވަހުން ފެށިގެން އިޒްރޭލުން ޣައްޒާއަށް 3000ށް ވުރެގިނަ ރޮކެޓް ހަމަލާ ވަނީ ދީފައެވެ. އެ މީހުން ހަމަލާތަކުގައި ޣައްޒާގެ އެތައް ބަޔަކު ވަނީ ޝަހީދު ކޮށްލާފައެވެ. އޭގެ ތެރޭގައި ގިނަ އަދަދެއްގެ ކުޑަކުދިން ހިމެނެއެވެ.
މުޅި ދުނިޔެ މިއަދު ދަނީ އިޒްރޭލްގެ މި ހަމަލާތައް ކުށްވެރިކޮށް އަޑުއުފުލަން ފަށާފައެވެ. ފަލަސްތީނާއި ދެކޮޅަށް ފަލަސްތީންގެ ބިންތަކަށް ވެރިވެގެން އުޅޭ އިޒްރޭލުން ހިންގަމުން އަންނަ ލާއިންސާނީ އަމަލުތަކުގައި އިޒްރޭލާއެކު އޮތްކަން ލަވާޒާ ގްރޫޕުން ހާމަކުރުމުން، ލަވާޒާ ބޯއިކޮޓް ކުރުމަށް ގޮވާލާ މުޅި ދުނިޔޭގައި ވަނީ ކެމްޕޭނެއް ވެސް ފަށާފައެވެ.
ފަލަސްތީނާއި، ފަލަސްތީނުގެ ބިންތަކަށް ވެރިވެގެން އުޅޭ އިޒްރޭލާއި ދެމެދު މިފަހުން މައްސަލަ ހޫނުވީ ޝައިޚް ޖައްރާހްގައި ދިރިއުޅޭ ފަލަސްތީން ރައްޔިތުން އެސަރަހައްދުން ނެރުމަށް އިޒްރޭލުން މަސައްކަތް ފެށި ހިސާބުންނެވެ.
ޝައިޚް ޖައްރާހްގެ މައްސަލައިގައި ރަމަޟާން މަސް ފެށުނީއްސުރެއް އިޒްރޭލުގެ ފުލުހުންނާއި ފަލަސްތީން ރައްޔިތުންނާއި މެދު ދަނީ ހަމަނުޖެހުންތައް ހިނގަމުންނެވެ. މި ހަމަނުޖެހުންތައް އެންމެ ބޮޑުވެފައިވަނީ ފާއިތުރު ދެ ހަފްތާއެއްގެ ތެރޭގައެވެ.
މި ހަމަނުޖެހުން ތަކުގައި އިޒްރޭލުގެ ފުލުހުން ވަނީ ރަމަޟާންމަހު އަލްއަޤްސާ މިސްކިތަށްވަދެ އެތަނުގައި ނަމާދަށް މީހުން ތިއްބާ އެތަނަށްވެސް ހަމަލާތައް އަމާޒުކޮށްފައެވެ. އަދި ޝައިޚް ޖައްރާހް މައްސަލައިގައި ކުރާ މުޒާހަރާތަކާ ދެކޮޅަށްވެސް އިޒްރޭލު ފުލުހުން އަންނަނީ ބާރުގެ ބޭނުންކުރަމުންނެވެ. އެގޮތުން "ސްކަންކް ވޯޓާ" ޖެހުމާއި ސްޓަން ގްރަނޭޑް އަދި ފެން ޖެހުންފަދަ ކަންކަން އިޒްރޭލުގެ ފުލުހުން އަންނަނީ ކުރަމުންނެވެ. އަދި މިހާރު ވައިގެ މަގުންވެސް ރޮކެޓް ހަމަލާތައް އަންނަނީ ދެމުންނެވެ.