ކުރީގެ ރައީސް މުހައްމަދު ނަޝީދުގެ ވެރިކަމުން ފެށިގެން ސަރުކާރުގެ މައި ވިޔަފާރި ކުންފުނި އެސްޓީއޯގެ މެނެޖިން ޑިރެކްޓަރުގެ މަގާމުގައު ހުންނެވި ޝާހިދު އަލީ (ޝާޑް) މަގާމުން ވަކިކޮށްފި ކަމުގެ މައުލޫމާތު "އައްޑޫ ލައިވް" އަށް ލިބިއްޖެ އެވެ.
އެނގިފައިވާ ގޮތުގައި އައްޑު އަށް ނިސްބަތްވާ ޝާޑް މަގާމުން ވަކި ކުރުމަށް ފަހު، އަބްދުﷲ ޔާމީންގެ އާ ސަރުކާރުން އެސްޓީއޯގެ މެނެޖިން ޑިރެކްޓަރަކަށް ހަމަޖައްސާފައި ވަނީ ޔާމީންގެ ސަރުކާރުގެ ޑިފެންސް މިނިސްޓަރު ކަމަށް ވެސް އައްޔަން ކުރި މުހައްމަދު ނާޒިމްގެ ކޮއްކޮ އާދަމް އާޒިމް އެވެ.
އޭނާ ކުރިން ހުންނެވީ އެސްޓީއޯގެ ސޭލްސް އެންޑް މާކެޓިން މެނޭޖަރުގެ މަގާމުގަ އެވެ.
އާ ރައީސް ޔާމީނަކީ އޭނާގެ ބޭބޭ އަދި ކުރީގެ ރައީސް މައުމޫން އަބްދުލް ގައްޔޫމްގެ ވެރިކަމުގައި އެސްޓީއޯގެ ޗެއާމަންކަން ކުރެއްވި ބޭފުޅެއްކަން ފާހަގަކޮށްލެވެ އެވެ.
ޝާޑް މަގާމުން ވަކިކޮށްފައިވާކަން އެނގިފައިވާ އިރު އޭނާއަކީ ގަން އެއާޕޯޓް ހިންގާ އައްޑޫ އިންޓަނެޝަނަލް އެއާޕޯޓް (އޭއައިއޭ) ގެ މެނެޖިން ޑިރެކްޓަރު ވެސް މެ އެވެ. އެ ކުންފުންޏަކީ އެސްޓީއޯ އާއި އެމްއޭސީއެލް އަދި ގަން އެއާޕޯޓް ކޮމްޕެނީ (ޖީއޭސީއެލް) ގުޅިގެން އުފައްދާފައިވާ ކުންފުންޏެކެވެ.
ޝާޑަކީ އެސްޓީއޯގެ މެނެޖިން ޑިރެކްޓަރުކަމުގެ މަގާމުގައި ހުންނަވައިގެން އެ ކުންފުންޏަށް ބޮޑެތި ކުރިއެރުންތަކެއް ހޯއްދަވާ ދެއްވާފައިވާ ބޭފުޅެއްކަން ފާހަގަ ކުރެވެ އެވެ.