ދުނިޔޭގެ އެކި ކަންކޮޅުތަކުގައި އިޒްރޭލުން ފަލަސްތީނަށް ދެމުންގެންދާ ހަމަލާތައް ހުއްޓާލުމަށް ގޮވަމުންދާއިރު ވެސް އަޑަށް ބީރު ކަންފަތެއް ދިނުމަށްފަހު ދެމުންގެންދާ ހަމަލާތައް އިތުރަށް ވަރުގަދަ ކުރުމަށް އިޒްރޭލްގެ ޕްރައިމް މިނިސްޓަރ ބެންޖަމިން ނަތަންޔާހޫ އަންގައިފިއެވެ.
ޓީވީ މެދުވެރިކޮށް އިޒްރޭލްގެ ސިފައިންނަށް ނަތަންޔާހޫ ވަނީ ހަމާސްއަށް ދޫ ނުކުރުމަށް ގޮވާލާފައެވެ. އާދީއްތަ ދުވަހު އިޒްރޭލުން ވަނީ ޣައްޒާގެ ތިން އިމާރާތެއް ބިމާއި ހަމަކޮށްފައެވެ. އަދި 42 މީހުން ޝަހީދު ކޮށްލާފައެވެ. ޣައްޒާގެ ހެލްތް މިނިސްޓްރީން ވަނީ އޭގެ ތެރޭގައި 16 އަންހެނުންނާއި 10 ކުޑަކުދިން ހިމެނޭ ކަމަށް ބުނެފައެވެ. އަދި 50ށް ވުރެ ގިނަ މީހުން ވަނީ ޒަޚަމްވެފައެވެ.
މިހާތަނަށް އައިއިރު އިޒްރޭލުން މިދިޔަ ހަފްތާގެ ހޯމަ ދުވަހު ދޭންފެށި ހަމަލާތަކުގައި ޣައްޒާގެ 200 އެއްހާ މީހުން ވަނީ ޝަހީދު ކޮށްލާފައެވެ. އަދި 1200 އެއްހާ މީހުން ވަނީ ޒަޚަމްވެފައެވެ.
އިޒްރޭލުން ދެމުންގެންދާ ހަމަލާތަކަށް ޖަވާބުދާރީ ވުމުގެ ގޮތުން ހަމާސް އަދި އިސްލާމިކް ޖިހާދުން އިޒްރޭލަށް ދިން ރޮކެޓް ހަމަލާތަކުގައި މިހާތަނަށް އިޒްރޭލްގެ 10 މީހުން މަރުވެފައިވާ ކަމަށް ރިޕޯޓްތައް ބުނެއެވެ.