ޗެނަލް 13 ގެ އިތުރުން މަޝްހޫރު ވިޔަފާރި ކުންފުންޏެއް ކަަމަށްވާ ގްލޯބަލް ލިންކްސްގެ ވެރިޔާގެ ހިތަދޫ ގެއިން ރޭ ވައްކަން ކުރި ކަމުގެ ތުހުމަތުގައި މީހަކު ހައްޔަރުކޮށްފި އެެވެ.
ފުލުހުންގެ ދެކުނު ޑިވިޝަންގެ ކޮމާންޑަރު ޗީފް އިންސްޕެކްޓަރު އަހުމަދު ޝިފާން މިއަދު ވަނީ އެކަން ކަށަވަރު ވެސް ކޮށް ދެއްވައިފަ އެވެ. އެކަމަކު އިތުރު ތަފުސީލެއް އޭނާ ނުދެއްވަ އެވެ.
ޖުނޭދު ވިދާޅުވީ ހިތަދޫގައި ހުންނަ އޭނާގެ ވިނަވި ގެއިން ވައްކަން ކުރީ ކޮޓަރީގެ ކުޑަދޮރު ހަލާކުކޮށްލައިގެން ކަމަށެވެ. އަދި އެތަނުން 300،000 އަށް ވުރެ ގިނަ ރުފިޔާ ވަގަށް ނަގާފައިވާ ކަމަށް އޭނާ ވިދާޅުވި އެވެ.
ޖުނޭދުގެ އަތުން ފައިސާ ވަގަށް ނެގި އިރު މި މަހުގެ 22 ވަނަ ދުވަހު ގްލޯބަލް ލިންކްސް އިން އައްޑޫގައި ބާއްވާ ދެވަނަ ފުޓްބޯޅަ މުބާރާތަށް ވެސް އޭނާ ގެންދަވަނީ ތައްޔާރުވަމުންނެވެ. އެ މުބާރާތަކީ 150،000ރ. ގެ މުބާރާތެކެވެ.
"މީގެ ސަބަބުން މުބާރާތަކަށް އެެއްވެސް އަސަރެއް ނުކުރާނެ. ހަމަ ރޭވިފައިވާ ގޮތަށް މުބާރާތް ކުރިއަށް ގެންދާނެ،" ޖުނޭދު ވިދާޅުވި އެވެ.
ޖުނޭދަކީ އޭނާގެ ކުންފުނިން ރާއްޖެ އަށް އެތެރެކޮށް ވިއްކާ ގިނަ އަދަދެއްގެ މުދާ ރީޓެއިލްކޮށާއި ހޯލްސޭލްކޮށް ވިއްކާ ފިހާރައެއް ވެސް ހިތަދޫގައި ހިންގަވާ ބޭފުޅެކެވެ.
ގްލޯބަލް ލިންކްސްގެ ގިނަ އަދަދެއްގެ ފައިސާތަކަކަށް ޚިޔާނާތްތެރިވިކަމުގެ ދައުވާ އެ ކުންފުނީގެ ކުރީގެ މުވައްޒަފެއްގެ މައްޗަށް ވެސް ކްރިމިނަލް ކޯޓުން މި އަހަރުގެ ޖުލައި މަހުގެ ތެރޭގައި ވަނީ އުފުލައިފި އެވެ.
އެ ދައުވާ އުފުލައިފައި ވަނީ މީދޫ ސީސަންވާދީ، މުހައްމަދު މުއާޒުގެ މައްޗަށެވެ.
އޭނާގެ މައްޗަށް ކުރާ ދައުވާގައި ވަނީ އޭނާ އެ ކުންފުނީގެ އޮފީސް އެސިސްޓެންޓެއްގެ ގޮތުގައި ހުރެ މިދިޔަ އޮކްޓޫބަރު މަހުގެ 17 ވަނަ ދުވަހު އެ ކުންފުނިން މޮރިޝަސް ކޮމާޝަލް ބޭންކަށް ޖަމާކުރަން އޭނާ އަތަށް ދިން 104،095ރ. އަށް އޭނާ ޚިޔާނާތްތެރިވެފައިވާ ކަމަށެވެ.