އިޒްރޭލުން ފަލަސްތީނަށް ދެމުންގެންދާ ހަމަލާގައި ޣައްޒާގައި ހުންނަ ޤަތަރުގެ ރެޑް ކްރެސެންޓް ސޮސައިޓީ(ކިއު.އާރް.ސީ.އެސް)ގެ އޮފީސް ގޮއްވާލައިފިއެވެ.
އިޒްރޭލުން ދިން މި ހަމަލާގައި ފަލަސްތީނުގެ 2 މީހަކު މަރުވެ 10 މީހަކު ވަނީ ޒަޚަމްވެފައެވެ. އެ ޖަމިއްޔާއިން ވަނީ އިޒްރޭލުން ހޯމަ ދުވަހު އެ އޮފީހަށް ހަމަލާދީފައިވާ ކަމަށް ބުނެ ޓްވީޓް ކޮށްފައެވެ. އެ ޖަމިއްޔާއިން ވަނީ އެ ހަމަލާ ކުށްވެރިކޮށްފައެވެ. އެމީހުންނަކީ ބައިނަލްއަޤްވާމީ ޤާނޫނުތަކާއި އެއްގޮތަށް މީހުންނަށް އެހީތެރިކަން އެހީތެރިކަން ފޯރުކޮށްދެމުންދާ ބަޔަކު ކަމަށާއި އެމީހުންނަށް އެ ފަދަ ހަމަލާއެއް އަމާޒު ކުރުމަކީ ބަލައިގަނެވޭނެ ކަމެއް ނޫން ކަމަށް ވަނީ ބުނެފައެވެ.
މި ހަމަލާއަށް ފަހު ޤަތަރުން ވަނީ ބައިނަލްއަޤްވާމީ ގޮތުން އެންމެން ނިކުމެ އިޒްރޭލުން ދެމުންގެންދާ މި ހަމަލާތައް ހުއްޓުމަކަށް ގެނައުމަށް ގޮވާލާފައެވެ. އިޒްރޭލުން ޣައްޒާއަށް ހަމަލާތައް ދޭން ފެށީއްސުރެ ކިއު.އާރް.ސީ.އެސްއިން ދަނީ ޣައްޒާގެ ރައްޔިތުންނަށް އެހީތެރިކަން ފޯރުކޮށްދޭން ފަށާފައެވެ. އަދި އެއް މިލިއަން ޑޮލަރުގެ ފަންޑެއް ލިބިފައިވާ ކަމަށް ވެސް އެމީހުންވަނީ ބުނެފައެވެ. އެ ފައިސާ ޚަރަދު ކުރުމަށް ހަމަޖެހިފައިވަނީ ސިއްޚީ ޚިދުމަތަށް ބޭނުންވާ ތަކެތި ހޯދުމަށް ކަމަށް އެ ޖަމިއްޔާއިން ވަނީ ބުނެފައެވެ.