އިޒްރޭލުން ފަލަސްތީނުގެ ޣައްޒާއަށް ދެމުންގެންދާ ހަމަލާތަކުގައި އިސްލާމިކް ޖިހާދުގެ ކޮމާންޑަރު ހުސާމް އަބޫ ހަރްބީދު ޝަހީދު ކޮށްލާފައިވާ ކަމަށް އެ ޖަމާއަތުން ހާމަކޮށްފިއެވެ.
އިޒްރޭލުން ބުނެފައިވާ ގޮތުގައި ހުސާމްއަކީ އެމީހުންނަށް ހަމަލާ ދިނުމުގައި އެންމެ ކުރީގައި ހުރީ އެކެކެވެ. ހަމާސްއިން ވަނީ އިޒްރޭލުން ހުސާމް ޝަހީދު ކޮށްލިތާ ކުޑައިރުކޮޅެއްގެ ތެރޭގައި އިޒްރޭލަށް ހަމަލާދީފައިވާ ކަމަށް ބުނެފައެވެ. އިޒްރޭލުން ހޯމަ ދުވަހު ކުރިޔަށް ގެންދިޔަ ވައިގެ ހަމަލާތަކުގައި ޣައްޒާގެ 3 މީހުން ވަނީ މަރާލާފައެވެ.
އިޒްރޭލުން ބުނެފައިވާ ގޮތުގައި ޣައްޒާއިން ވަނީ ދަންވަރު އެމީހުންނަށް އަމާޒުކޮށް 60 ރޮކެޓް ހަމަލާދީފައެވެ. އެއަށް ރައްދު ދެމުން ހަމާސްއިން ބުނެފައިވަނީ ޣައްޒާއިން އިޒްރޭލަށް ހަމަލާދެނީ އެމީހުން އެއްވެސް ހައްޤަކާއިނުލާ ފަލަސްތީނުގެ އެތައް ބަޔަކު ޝަހީދުކޮށް ހިންގަމުންދާ ޓެރަރިސްޓް ހަމަލާތަކުގެ ބަދަލު ކަމަށެވެ.
އިޒްރޭލްގެ ހަމަލާތަކުގައި މިހާތަނަށް 200ށް ވުރެ ގިނަ ފަލަސްތީނު ރައްޔިތުން ވަނީ ޝަހީދުވެފައެވެ. އޭގެ ތެރޭގައި 58 ކުޑަކުދިން ވެސް ހިމެނޭ ކަމަށް ރިޕޯޓްތައް ބުނެއެވެ.