ލ. އަތޮޅުގައި ކޮވިޑަށް ފަރުވާ ދެމުން ދިޔަ ދެ މީހަކު މަރުވެއްޖެއެވެ.
މައުލޫމާތު ލިބިފައިވާ ގޮތުގައި ކޮވިޑަށް ފަރުވާ ދެމުންދަނިކޮށް މަރުވެފައިވަނީ ލ. މާވަށައް ނިސްބަތްވާ އުމުރުން 69 އަހަރުގެ އަންހެނަކާއި، ލ. ގަމު މަތިމަރަދޫއަށް ނިސްބަތްވާ 88 އަހަރުގެ ފިރިހެނެކެވެ. މި ދެމީހުންނަކީވެސް ލ. ގަމު ރީޖަނަލް ހޮސްޕިޓަލްގެ ކޮވިޑު ފެސިލިޓީގައި ފަރުވާ ދެމުން ދިޔަ ދެ މީހުންނެވެ.
ލ އިން ދެމީހަކު ކޮވިޑުގައި މަރުވެފައިވާ އިރު މިހާތަނަށް ރާއްޖެއިން 107 މީހަކު ވަނީ ކޮވިޑުގައި މަރުވެފައެވެ. ރާއްޖޭގައި ހަލުވި ކަމާއި އެކު ކޮވިޑު ފެތުރެމުން އަންނަ އިރު ފާއިތުވި ދުވަސްތަކުގައި ގިނައިން މަރުވެފައިވަނީ އުމުރުން ދުވަސްވީ މީހުންނެވެ. ނަމަވެސް ދާދި ފަހުން އުމުރުން 30 އަހަރުގެ ޒުވާނަކުވެސް ވަނީ ކޮވިޑުގައި މަރުވެފައެވެ.
އެޗްޕީއޭއިން ބުނީ އައިސީޔޫގައި އެޑްމިޓުކޮށްގެން ފަރުވާދެމުންދާ ޒުވާނުންގެ އަދަދު އިތުރުވަމުން އަންނަ އިރު މާބަޑު މީހުންނާއި ކުޑަކުދިންނަށްވެސް ބަލީގެ ނުރައްކާ ބޮޑު ކަމަށެވެ.