އައްޑޫގެ އާ ސިޓީ ކައުންސިލުން އެންމެ ބޮޑު އިސްކަމެއްދޭނީ އައްޑޫގެ ޓޫރިޒަމް ކުރިއެރުވުމަށްކަމަށް މޭޔަރު އަލީ ނިޒާރު ވިދާޅުވެއްޖެއެވެ.
އާ ކައުންސިލްގެ މަސައްކަތްތަކާއި ގުޅޭގޮތުން ވާޗުއަލްކޮށް ބޭއްވި ފުރަތަމަ ނޫސް ކޮންފަރެންސްގައި ނިޒާރު ވިދާޅުވީ އާ ކައުންސިލުން އެންމެ ބޮޑު އިސްކަމެއްދޭނީ ނިމިގެން ދިޔަ ކައުންސިލުން ފަށާފައިވާ އައްޑޫގެ ޓޫރިޒަމް މަޝްރޫއު ކުރިއަށް ގެންދިއުން ކަމަށެވެ.
އައްޑޫގައި ޓޫރިޒަމް ފުޅާ ކުރުމަށް ގެސްޓު ހައުސް އެޅުމަށް ނިމިގެން ދިޔަ ކައުންސިލުން ވަނީ ބިންތައް ކަނޑައަޅައި ބައެއް ފަރާތްތަކާއި ހަވާލުކޮށްފައެވެ.
ނިޒާރު ވިދާޅުވީ ޓޫރިޒަމް މަޝްރޫއަކީ ސީދާ ކައުންސިލްގެ ބެލުމުގެ ދަށުން ކުރިއަށް ގެންދާ ޕްރޮޖެކްޓެއް ކަމަށެވެ. އެގޮތުން އާ ކައުންސިލުން ޓޫރިޒަމް ޒޯން ކަނޑައަޅައި، ޓޫރިޒަމް ޒޯން ތަރައްޤީ ކުރުމުގެ މަސައްކަތަށް ހާއްސަ އިސްކަމެއްދޭނެކަމަށެވެ.
އައްޑޫގެ ޓޫރިޒަމް ފުޅާކުރުމާއި ގުޅޭ ގޮތުން އިއްޔެ ހެނދުނު ޓޫރިޒަމް މިނިސްޓަރ އާއި އެކުވެސް ވަނީ ވާޗުއަލް ބައްދަލުވުމެއް ބާއްވާފައެވެ. މި ބައްދަލުވުމުގައި ލޯކަލް ޓޫރިޒަމް ތަރައްޤީ ކުރުމަށާއި، ލޭންޑް ޔޫސް ޕްލޭން އެކުލަވާލުމަށް ފަންނީ އެހީ ފޯރުކޮށްދިނުމާއި، ޒުވާނުންނާއި އަންހެނުން ފަތުރުވެރިކަމުގެ ދާއިރާގެ ވަޒީފާތަކަށް ތަމްރީނުކުރުމަށް ބޭނުންވާ ޕްރޮގްރާމްތައް ހިންގުމާ ގުޅޭގޮތުން ވަނީ މަޝްވަރާކޮށްފައެވެ.
ނިޒާރު ވިދާޅުވީ ޓޫރިޒަމް ތަރައްޣީ ކުރުމުގެ ގޮތުން އައްޑޫގެ ފަޅުން ހަތަރު ރަށް ހިއްކުމަކީ ސަރުކާރުން އަތޮޅުތެރޭގެ ރަށެއްގައި ޓޫރިޒަމް ތަރައްޤީ ކުރުމަށް ހިންގާނެ އެންމެ ބޮޑު ޕްރޮޖެކްޓު ކަމަށެވެ.