އިޒްރޭލުން ފަލަސްތީނުގެ ޣައްޒާއަށް ދެމުންގެންދާ ޓެރަރިސްޓް ހަމާލާގައި ޣައްޒާގެ ވޮއިސް އޮފް އަލްއަޤްޞާގެ ޖާނަލިސްޓެއް ކަމަށްވާ ޔޫސުފް އަބޫ ޙުސައިން ޝަހީދުކޮށްލައިފިއެވެ.
އިޒްރޭލުން ދިން ވައިގެ ހަމަލާއެއް ޔޫސުފްގެ ގެއަށް އަރާ، އޭނާ ޝަހީދުވެފައިވާ ކަމަށް އޭނާގެ އާއިލާ މީހުންނާއި އަދި އެކުގައި މަސައްކަތް ކުރާ ފަރާތްތަކާއި ހަވާލާދީ އަލްޖަޒީރާއިން ރިޕޯޓް ކޮށްފައިވެއެވެ. ޔޫސުފް ހިމެނެނީ ބުދަ ދުވަހު އިޒްރޭލުގެ ހަމަލާތަކުގައި ޝަހީދު މިހާތަނަށް ވެފައިވާ 4 މީހުންގެ ތެރެއިން އެކަކަށެވެ.
" އަހަރުމެންނަށް ކިރިޔާ ގެއިން ނިކުމެވުނީ. ޔޫސުފަކަށް ނުނިކުމެވުނު." ހަމަލާގައި ކަންތައް ހިނގާދިޔަގޮތް ކިޔާދެމުން ޔޫސުފްގެ ބައްޕަ މުހައްމަދު އަބޫ ހުސައިން ބުންޏެވެ.
ޔޫސުފް މަސައްކަތް ކުރަމުންދުޔަ އަލްއަޤްޞާ ރޭޑިއޯ ސްޓޭޝަނުންވަނީ އެމީހުންގެ ސްޓާފަކު އެގޮތަށް ގެއްލިގެން ދިޔުމުން އިންތިހާއަށް ހިތާމަކޮށް އާއިލާއަށް ތައުޒިޔާ ކިޔާފައެވެ. އަދި މުޅި ދުނިޔެ އިޒްރޭލުން މިދެމުންގެންދާ ލާއިންސާނީ ހަމަލާތައް ހުއްޓުވުމަށް އެހީވުމަށް ވެސް އެ ރޭޑިއޯއިން ވަނީ ގޮވާލާފައެވެ.
އިޒްރޭލުން ދެމުންގެންދާ ހަމަލާތައް އިތުރުކޮށް ވަރުގަދަ ކުރަމުން ގެންދާއިރު މިހާރު ވަނީ ފަލަސްތީނު 200 އަށްވުރެ ގިނަ މީހުން މި ހަމަލާތަކުގައި ޝަހީދު ވެފައެވެ. މީގެ ތެރޭގައި ގިނަ އަދަދެއްގެ ކުޑަކުދިން ވެސް ހިމެނެއެވެ.