ގެވެށި އަނިޔާގެ މައްސަލަތަކުގައި އެމްޑީޕީއިން ނަގާ ސްޓޭންޑަކީ ކޮބައިތޯ؟: ޝެއިޚް ޒައިދު

ގެވެށި އަނިޔާގެ މައްސަލަތަކުގައި އެމްޑީޕީއިން ނަގާ ސްޓޭންޑަކީ ކޮބައިތޯ އައްސަވާ ރާއްޖޭގެ މަޝްހޫރު ދީނީ އިލްމުވެރިޔާ ޝެއިޚް ޒައިދު އެމްޑީޕީއަށް ސުވާލެއް އަމާޒުކޮށްފިއެވެ.

ޝެއިޚް ޒައިދު ކުރެއްވި ޓްވީޓްގައި ވަނީ އެފަދަ މީހުން ޕާޓީގެ އިސް ސަފުގައި ތިބިނަމަ އެފަދަ ފަރާތްތަކާއިމެދު ޕާޓީއިން އަޅާނީ ކޮން ފިޔަވަޅެއްތޯ ވެސް އައްސަވާ ސުވާލު ކުރައްވާފައެވެ.

ޝެއިޚް ޒައިދު މިފަދައިން ސުވާލު ކުރައްވާފައި މިވަނީ ކެނދިކުޅުދޫ ދާއިރާގެ މެމްބަރު އަހުމަދު އީސާ އޭނާގެ އަނބިމީހާއަށް ގެވެށި އަނިޔާ ކޮށްފައިވާ މައްސަލަ ފެންމަތިވެފައިވާ ވަގުތެއްގައެވެ. މި މައްސަލައިގެ ސަބަބުން އޭނާ މަޤާމުން ވަކި ކުރުމަށް ގިނަ ބަޔަކު ދަނީ ގޮވަމުންނެވެ.

އީސާ އިޖުތިމާއީ ކޮމިޓީގެ މުގައްރިރު ކަމުން ވަކިކުރުމަށް އެ ކޮމިޓީގައި ހިމެނޭ މެމްބަރުން ވަނީ ހުށަހަޅާފައެވެ. ރައްޔިތުންގެ މަޖިލީހުގެ އަމީންއާންމު ފާތިމަތު ނިއުޝާ "އައްޑޫލައިވް"އަށް މައުލޫމާތު ދެއްވަމުނުް ވިދާޅުވީ، އީސަ މުގައްރިރު ކަމުން ވަކިކުރުމަށް އިޖްތިމާއީ ކޮމިޓީގެ ތިންބައި ކުޅަ އެއްބައި މެމްބަރުން ސޮއިކޮށް ހުށަހަޅާފައިވާކަމަށެވެ.

އީސަ ކޮމިޓީ މުގައްރިރުކަމުން ވަކިކުރުމަށް ކޮމިޓީގެ ތިން ބައިކުޅަ އެއްބައި މެމްބަރުން ސޮއިކޮށް ހުށަހަޅާފައިވާއިރު، އެ ބެލެވޭނީ ނޯޓިސްއެއްގެ ގޮތުގައެވެ. އަދި އީސަ މުގައްރިރުކަމުން ވަކިވާނީ މެންބަރުންގެ މެދުގައި ވޯޓެއް ނަގައި އަގުލަބިއްޔަތުން ފާސްކޮށްގެނެވެ. އިޖުތިމާއީ ކޮމިޓީގައި އެންމެ މެމްބަރެއް ފިޔަވާ އެހެން ހުރިހާ މެމްބަރުންނަކީ އެމްޑީޕީއަށް ނިސްބަތްވާ މެމްބަރުންނެވެ.