އިންޓަނޭޝަނަލް އެއިޑް ކެމްޕެއިން(އައިއޭސީ) މޯލްޑިވްސްގެ ފަރާތުން ފަލަސްތީނަށް އިމަޖެންސީކޮށް އެހީވުމުގެ ފުރުސަތު ބޭނުންވާ ފަރާތްތަކަށް ހުޅުވާލާފައިވާ ފުރުސަތުގެ މުއްދަތު އިތުރުކޮށްފިއެވެ.
މި މުއްދަތު އިތުރު ކޮށްފައިވަނީ 5 ޖޫން 2021 ގެ ނިޔަލަށެވެ.
މިވަގުތު ފަލަސްޠީންގެ ހާލަތު ވަރަށް ބޮޑަށްގޯސްވެފައި ވާތީ، ފަލަސްޠީނަށް އިމަޖެންސީ އެހީ ދެވޭނެ ގޮތެއް ނެތްތޯ ވަރަށް ގިނަ ފަރާތްތަކުން ސުވާލު ކުރަމުންދާ ކަމަށާއި އައިއޭސީއިން އަބަދުވެސް ގެންދަނީ އެއިރެއްގައި އެންމެ ބޮޑަށް އެހީ ބޭނުންވާ ފަރާތަށް ދެނެގަނެ އެފަރާތް ތަކަށް އެހީ ފޯރުކޮށްދިނުމަށް މަސައްކަތް ކުރަމުން ކަމަށްވާތީ މިހާރު ކުރިއަށްދާ " ލޯތްބާއިއެކު 2021" ގެ ތެރެއިން ފަލަސްޠީނަށް އިމަޖެންސީ އެހީ ފޯރުކޮށްދިނުމަށް ވަނީ ނިންމާފައި ކަމަށް އައިއޭސީއިން ބުނެފައިވެއެވެ.
އައިއޭސީއިން ވަނީ ދިވެހީންގެ ފަރާތުން ދިން އެހީ ނަގުދު ފައިސާގެ ގޮތުގައި ފަލަސްތީނުގެ އާއިލާތަށް ހަދިޔާކޮށްފައެވެ. އައިއޭސީން ބުނީ ފައިސާގެ އެހީ ތިން ޕާޓްނަރެއް މެދުވެރިކޮށް ޣައްޒާގެ 90 އާއިލާއަށް, ކޮންމެ އާއިލާއަކަށް 100 އެމެރިކާ ޑޮލަރުގެ މަގުން ފޯރުކޮށްދެވިފައިވާ ކަމަށެވެ.
"އުންމީދަކީ އަދި ދުޢާއަކީ މިފައިސާގެ ސަބަބުން އެ އަޚުންނާއި އުޚްތުންނަށް ބޭނުންޖެހިފައި ވާ ކަންތައްތަކުގެ ތެރެއިން ކޮންމެސް މިންވަރެއް ހާސިލްވުން" އައިއޭސީން ބުންޏެވެ.
މީގެއިތުރުން އައިއޭސީން ވަނީ ގައްޒާގެ އަލް ޝިފާ ހޮސްޕިޓަލަށް ކަރަންޓު ދިނުމަށް ތެޔޮ ވެސް ހަދިޔާކޮށްފައެވެ. އަލް ޝިފާ ހޮސްޕިޓަލަކީ ފަލަސްޠީނުގައި ހުންނަ އެންމެ ބޮޑު ހޮސްޕިޓަލް ކަމަށްވާއިރު މި ހޮސްޕިޓަލަކީ އެންމެ ބޮޑަށް އަނިޔާ ވާ މީހުންނަށް ފަރުވާދެމުންދާ ހޮސްޕިޓަލު ކަމަށް އައިއޭސީން ބުންޏެވެ.
އަދި ހަމަލާތަކުގެ ސަބަބުން ކަރަންޓުގެ ދަތިކަން ކުރިމަތިވަމުން ދާތީ ދިވެހީންގެ އެހީގެ ގޮތުގައި 2547 ލީޓަރުގެ ތެޔޮ އެ ހޮސްޕިޓަލަށް ހަދިޔާކޮށްފައިވާ ކަމަށް އައިއޭސީން ބުންޏެވެ.
މި ކެމްޕޭނުގައި ބައިވެރިވެވަޑައިގަތުމަށް ޚިޔާރު ކުރައްވަންވީ އެކައުންޓްގެ މައުލޫމާތު އެ ބޭފުޅުން ވަނީ އާންމު ކުރައްވާފައެވެ.
ބޭންކް: ބީއެމްއެލް އިސްލާމިކް
އެކައުންޓް ނަމްބަރު: 7770000026259 (ރުފިޔާ އެކައުންޓް)
އިތުރު މަޢުލޫމާތު ސާފު ކުރެއްވުމަށް ހޮޓްލައިން : 9122121 އަދި ވައިބާ: 9122121 އަށް ގުޅުއްވުމުން މައުލޫމާތު ލިބިގެންދާނެއެވެ.
މި ކޭމްޕްގައި ބައިވެގެން ކޮންމެ ދިވެއްސަަކަށް ވެސް ކިތަންމެ ކުޑަ މިންވަރަކުން ނަމަވެސް ފަލަސްތީނު ރައްޔިތުންނަށްޓަކައި އެހީތެރިކަމެއް ފޯރުކޮށް ދެވިދާނެއެވެ. ފުރުސަތުގެ ބޭނުން ކުރައްވަމާ ހިންގަވާށެވެ.