އައްޑޫ ކައުންސިލްގެ ވަގުތީ ސެކްރެޓަރީ ޖެނެރަލް (އެސްޖީ) އަކަށް ކައުންސިލްގެ ޑިރެކްޓަރ މުހައްމަދު ހަލީމް ހަމަޖެއްސުމަށް ކައުންސިލުން ނިންމައިފިއެވެ.
ހަލީމު އެސްޖީގެ މަގާމަށް ގެނައުމަށް ހުށަހެޅުއްވީ މޭޔަރ އަލީ ނިޒާރުއެވެ. ނިޒާރު ވިދާޅުވީ ވަގުތީ އެސްޖީއަކަށް ހަލީމު ހަމަޖެއްސުމަށް ހުށަހެޅުއްވީ މިހާރު ވަގުތީ އެސްޖީ އަކަށް ހުންނެވި މުހައްމަދު ލުޠުފީ އަކީ ކައުންސިލްގެ ޕްލޭނިން ސެކްޝަނާއި ހަވާލުވެ ގިނަ ޒިއްމާތަކެއް އަދާކުރައްވަން ޖެހޭ ބޭފުޅެއް ކަމަށެވެ. އަދި ހަލީމު އަކީ ތަޖްރިބާ ހުރި ބޭފުޅަކަށް ވެފައި ކައުންސިލުން އަވަހަށް ކުރަން ހުރި ކަންކަން ކުރުމުގައި ހަލީމުގެ ތަޖްރިބާ ކައުންސިލަށް ބޭނުން ކުރެވޭނެތީކަމަށެވެ.
ހަލީމުގެ ނަން ހުށަހެޅުމަށް ފަހު ކައުންސިލަރުންގެ ހިޔާލު ހޯދުމަށް ފުރުސަތު ހުޅުވުން، ހިތަދޫ ކޮރޮވައު ދާއިރާގެ ކައުންސިލަރު އިބްރާހިމް ޝިނާޒު މޫސާ ވިދާޅުވީ ކައުންސިަށް ބޭނުންވަނީ ޒުވާން ކައުންސިލް ޒަމާނީ ގޮތަށް ހިންގޭނެ އާ ސިކުޑިއެއް ކަމަށެވެ. ނަމަވެސް މޭޔަރ ހަލީމު ގެންނަން ބޭނުންފުޅުވުމުން އެކަމަށް ތާއިދު ކުރައްވާ ކަމަށާއި،. ދާއިމީ އެސްޖީއެއް ނަގާއިރު އެކަމަށް ވިސްނަވާނެ ކަމަށް ގަބޫލް ކުރައްވާ ކަމަށެވެ.
ހަލީމު މިވަގުތު މަސައްކަތް ކުރައްވަނީ މަރަދޫ އޮފީހުގެ ޑިރެކްޓަރެއްގެ ގޮތުގައި މަރަދޫ އޮފީހުގައެވެ.
މޭޔަރ ނިޒާރު ވިދާޅުވީ އެސްޖީއަކަށް ހަލީމު ހަމަޖެއްސުމަށް ފަހު މަރަދޫ އޮފީހަށް އިތުރު ބޭފުޅަކު ކައުންސިލުން ހަމަޖައްސާނެކަމަށެވެ.
އައްޑޫ ކައުންސިލްގެ ތިން ވަނަ ދައުރުގައިވެސް އެސްޖީއަކު ހަމަޖައްސާފައިވަނީ ވަގުތީ ގޮތުންނެވެ.