ފާއިތުވި 24 ގަޑިއިރަކީ، އެ ކަމަނާއާއި އެކަމަނާގެ ތުއްތު ދަރިފުޅަށް އުނދަގޫ އިޙްސާސްތަކެއް ކުރަންޖެހުނު ވަގުތުތަކެއް ކަމަށް ކެނދިކުޅުދޫ ދާއިރާގެ މެމްބަރު އަހުމަދު އީސަގެ އަނބިމިހާ އަދި ނައިބު ރައީސް ފައިސަލް ނަސީމްގެ ކޮއްކޯފުޅު އަސްރާ ނަސީމް ވިދާޅުވެއްޖެއެވެ.
އީސާ ގެވެށި އަނިޔާ ކޮށްގެން މައްސަލަ ފުލުހުން ބެލުމަށް ބަޔާން ދިނުމަށްފަހު މިއީ އަސްރާގެ ބަހެއް އާންމުންނާއި ހަމަޔަށް އައި ފުރަތަމަ ފަހަރެވެ. އަސްރާ ވަނީ ފޭސްބުކްގެ ސްޓޭޓަސް އެއްގައި އެ ކަމަނާއާއި ދަރިފުޅުގެ ހާލު ރަނގަޅު ކަމަށް ވިދާޅުވެފައެވެ.
"ފާއިތުވި 24 ގަޑިއިރަކީ، އަޅުގަނޑާއި އަޅުގަނޑުގެ ތުއްތު ދަރިފުޅު ލޫޠު އަށް އުނދަގޫ އިޙްސާސްތަކެއް ކުރަންޖެހު ވަގުތުތަކެކެވެ. ކުރިމަތިވާނެ ކަމަށް ދުވަކުވެސް ހީކޮށްފައިނުވާ ކަންތައްތަކެއް ތަޖުރިބާކުރަންޖެހުނެވެ. ނަމަވެސް މާތްﷲ ގެ ވާގިފުޅާއެކު، އަޅުގަނޑުމެން ދެމައިންގެ ޙާލުވެސް މިހާރު ރަގަނޅެވެ. މި އުނދަގޫ ވަގުތުގައި، ރަޙުމަތްތެރިންނާއި، ހެޔޮއެދޭ އެންމެހައި ފަރާތްތަކުން، އަޅުގަނޑަށް ދެއްވި ހިތްވަރަށްޓަކައި ހިތުގެ އެންމެ ފުންމިނުން އެފަރާތްތަކަށް ޝުކުރު ދަންނަވަމެވެ. ޝުކުރިއްޔާ" އަސްރާ ވިދާޅުވިއެވެ.
އީސާ އޭނާގެ އަނބިމީހާއަދި ދަރިފުޅަށް ގެވެށި އަނިޔާ ކުރި މައްސަލައިގާ އޭނާ މަޤާމުން ވަކި ކުރުމަށް ގިނަ ބަޔަކު ދަނީ ސޯޝަލް މީޑިއާގައި ގޮވާލަމުންނެވެ.
އީސަ އިޖުތިމާއީ ކޮމިޓީގެ މުގައްރިރުކަމުން ވަކިކުރުމަށް އިތުބާރު ނެތްކަމުގެ މައްސަލައެއް ކޮމިޓީގެ ނައިބު މުގައްރިރު ހުސަައިން ފިރުޝާން އާއި ހިންނަވަރު ދާއިރާގެ މެމްބަރު ޖީހާން މަހުމޫދް އަދި މަކުނުދޫ ދާއިރާގެ މެމްބަރު މުހައްމަދު ރާއީ ވަނީ ހުށަހަޅާފައެވެ.