އައްޑޫ ސިޓީ ކައުންސިލުން ހިތަދޫ ޝަރަފުއްދީން ސްކޫލަށް 24،000ރ. ގެ ފައިސާގެ އެހީއެއް ވެދެއްވައިފި އެވެ.
މި އެހީއަކީ، ޝަރަފުއްދީން ސްކޫލްގައި ހިންގާ ސެން ކްލާހުގެ ފަސް ޓީޗަރުން، ޚާއްސަ އެހީއަށް ބޭނުންވާ ކުދިންނަށް ސްރީލަންކާގައި ހިންގާ ޚާއްސަ ތަމްރީން ޕްރޮގްރާމެއްގައި ބައިވެރިވުމަށް، އެ ގައުމަށް ދިއުމަށްޓަކައި ބޭނުންވާ ޓިކެޓްގެ ޚަރަދު ހޯދުމަށް، ކައުންސިލަށް ހުށަހެޅުމާ ގުޅިގެން ވެދެއްވި އެހީއެކެވެ.
މި އެހީއަކީ ހާއްސަ އެހީއަށް ބޭނުންވާ ކުދިންނަށް ކިޔަވައިދޭ ޓީޗަރުންނަށް އަމާޒުކޮށްގެން ލަންކާގައި ބޭއްވި ވޯކްޝޮޕަކަށް ދާން، ދިން އެހީއެކެވެ.
އެ ވޯކްޝޮޕްގައި ޝަރަފުއްދީންގެ ހާއްސަ އެހީއަށް ބޭނުންވާ ކުދިންނަށް ކިޔަވައިދޭ ޓީޗަރުން ބައިވެރިވުމަށް ފަހު މި މަހުގެ 17 ވަަނަ ދުވަހު ވަނީ އެނބުރި އައިސްފަ އެވެ.
ޝަރަފުއްދީން ސްކޫލްގައި ހިންގާ ސެން ކްލާހަކީ، އެފަދަ ހަމައެކަނި ކްލާސް ކަމަށްވެފައި، މި ކްލާސް ހިންގުމަށް ބޭނުންވާ ބަޖެޓް 2013 ވަނަ އަހަރު އެ ސްކޫލަށް ލިބިފައި ނުވުމާއެކު، ޚާއްސަ އެހީއަށް ބޭނުންވާ ކުދިންނަށް އެހިތެރިކަން ފޯރުކޮށް ދެވޭނެ މަގު ތަނަވަސްކޮށް، އެ ކުދިންނަކީ މުޖުތަމަޢަށް ބޭނުންވާ ބަޔަކަށް ހެދުމަށްޓަކައި މިފަދަ އެހިތެރިކަމެއް ފޯރުކޮށް ދިނުމަކީ، ކައުންސިލުން ކުރަންޖެހޭ ކަމެއްކަމަށް ކައުންސިލްގެ މިއަހަރުގެ 32 ވަނަ ބައްދަލުވުމުން ވަނީ ނިންމަވާފަ އެވެ.
ކައުންސިލުން ޖަމާޢަތުގެ ފައިދާއަށްޓަކައި ކުރާ މަސައްކަތްތަކަށް މީގެ ކުރިން ވެސް ސްކޫލަތަކަށާއި އެކި ކަން ކަމަށް އައްޑޫ ސިޓީ ކައުންސިލުން އެހީތެރިވެ ދީފައިވާ ކަމަށެވެ.