ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް ދެވުނު ހަމަލާގެ ތުހުމަތުގައި ހައްޔަރު ކުރެވުނު ބައެއް މީހުންނާއި، އެ އޮޕަރެޝަންގައި ހަރަކާތްތެރިވި ބައެއް ފުލުހުން ކޮވިޑަށް ޕޮޒިޓިވްވެއްޖެއެވެ.
މައުލޫމާތު ލިބިފައިވާ ގޮތުގައި ނަޝީދަށް ދެވުނު ހަމަލާގެ ތުހުމަތަށް ހައްޔަރު ކުރެވުނު މީހުންނާއި އޮޕަރޭޝަންގައި ބައިވެރިވި ބައެއް ފުލުހުން ކޮވިޑަށް ޕޮޒިޓިވްވުމާއި ގުޅިގެން އެމީހުންގެ ކޮންޓެކްޓުންގެ ކަރަންޓީނު ވުމާއި ގުޅިގެން ތަހްގީގަށް ވަނީ ހުރަސް އެެޅިފައެވެ. މީގެ އިތުރުން މި ހަމަލާއަށް ފަހު ހަރުކަށި ފިކުރުގެ ބޮޑެތި މީހުން ހައްޔަރު ކުރުމަށް ހިންގި އޮޕަރޭޝަން ތަކުގައި ހައްޔަރުކުރެވިފައިވާ ބައެއް މީހުންވެސް ވަނީ ކޮވިޑަށް ޕޮޒިޓިވްވެފައެވެ.
ރައީސް ނަޝީދަށް ދެވުނު ހަމަލާގެ ތުހުމަތަށް 4 މީހަކު މިހާތަނަށް ވަނީ ހައްޔަރު ކުރެވިފައެވެ. އެއީ އަހުމަދު އަދުހަމް، 25، އާއި މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ސައިކަލުގެ ވެރި މީހާ ތަހުމީން އަހްމަދު، 32 އެވެ. އޭގެ އިތުރުން އިއްޔެ ރޭގެ ވަގުތެއްގައި އެ މައްސަލައިގައި ބ. ދަރަވަންދޫއިން މީހަކު ވަނީ ހައްޔަރުކޮށްފައެވެ. ދަރަވަންދޫއިން ހައްޔަރު ކުރީ ލ.ގަން، ދުންފިނި އުފާ، އަހުމަދު ފާތިހު، 23އެވެ.
ފުލުހުން ބުނީ ދަރަވަންދޫ އިން ހައްޔަރު ކުރި ފާތިހު އަކީ ގޮއްވާލި ސައިކަލް އެސަރަހައްދުގައި ބެހެއްޓި މީހާއެވެ. މި ހަމަލާގެ ތުހުމަތަށް ހައްޔަރު ކުރި މީހުންގެ ޑީއެންއޭ ގޮއްވާލުމަށް ގެންގުޅު ސާމާންތަކުން ފެނިފައިވާ ކަމަށް ފުލުހުން ވަނީ ބުނެފައެވެ.