ކޮވިޑް-19 ޖެހިގެން އިތުރު ދިވެއްސަކު ނިޔާވެއްޖެއެވެ.
އެޗްޕީއޭ އިން ބުނީ މި ބަލީގައި އެންމެފަހުން ނިޔާވެފައިވަނީ 80 އަހަރުގެ ދިވެހި އަންހެނެއް ކަމަށެވެ. އޭނާ އަކީ ހުޅުމާލެ މެޑިކަލް ފެސިލިޓީގައި ފަރުވާދެމުންދިޔަ މީހެއް ކަމަށާއި އޭނާ ނިޔާވެފައިވަނީ މިރޭ 10:54 ހާއިރު ކަމަށެވެ.
މިއީ މި ބަލީގައި ރާއްޖެއިން ނިޔާވި 118 ވަނަ ފަރާތެވެ. އަދި މިއީ މި މަހު މި ބަލީގައި ރާއްޖެއިން ނިޔާވި 44 ވަނަ ފަރާތެވެ. މި މަހަކީ މި ބަލީގައި އެންމެ ގިނަ އަދަދަކަށް މީހުން ނިޔާވި މަހެވެ.
ރާއްޖޭގައި މިވަގުތު 20،000 އަށް ވުރެ ގިނަ އެކްޓިވް ކޭސް އުޅޭއިރު، 200 އަށް ވުރެ ގިނަ މީހުންނަށް އަންނަނީ ހޮސްޕިޓަލުގައި ފަރުވާ ދެމުންނެވެ. ހަމައެކަނި އައްޑޫ ސިޓީގައި ވެސް މި ބައްޔަށް ފައްސިވެފައިވާ 175 މީހުން އެބަތިއްބެވެ. އަދި ހޮސްޕިޓަލުގައި އެޑްމިޓް ކުރެވި 6 މީހުންނަށް ދަނީ ފަރުވާ ކުރަމުންނެވެ.