މަލީހް ޕީޖީ ޝަމީމަށް: ހަނީމޫން ޕީރިއަޑް ނިމިއްޖެ، ނަތީޖާ ނެރެދެއްވާ!

ހަނީމޫން ޕީރިއަޑް ނިމިއްޖެ ކަމަށާއި، ނަތީޖާ ނެރެދެއްވުމަށް ޕްރޮސިކިއުޓާ ޖެނެރަލް ހުސައިން ޝަމީމްގެ ގާތުން ކުރީގެ ކޮމިއުނިކޭޝަން މިނިސްޓަރު މުހައްމަދު މަލީހު ޖަމާލު އެދިވަޑައިގެންފިއެވެ.

މަލީހް ކުރެއްވި ޓްވީޓެއްގައި މި ފަދައިން އެދިވަޑައިގެންފައި މި ވަނީ، ކެނދިކުޅުދޫ ދާއިރާގެ މެންބަރު އަހްމަދު އީސާގެ މައްޗަށް ތުހުމަތުކުރާ ގެވެށި އަނިޔާގެ މައްސަލައެއްގައި އޭނާ ހައްޔަރު ކުރުމުގެ އަމުރަކަށް ފުލުހުން ޕީޖީގައި އެދުމުން އެ އަމުރަށް ކްރިމިނަލް ކޯޓުގައި އެދި ކޯޓުން އެ އަމުރު ނުދޭން ނިންމާފައިވަނި ކޮށެވެ. އެ މައްސަލަ ޕީޖީގެ ފަރާތުން ހައިކޯޓުގައި އިސްތިއުނާފު ކުރުމާމެދު އަދި ގޮތެއް ނިންމާފައި ނުވާކަމަށް ޕީޖީން ވަނީ މައުލޫމާތު ދީފައެވެ.

އީސާގެ މައްސަލައިގާ ދެކެވޭ ވާހަކަތަކަށް އިޝާރާތް ކުރައްވާ ޕީޖީ ޝަމީމް އެ ބޭފުޅާގެ ބްލޮގްގައި ލިޔުއްވާފައިވަނީ "ހައްޔަރުކުރުން ހުއްދަ ސަބަބުތައް ޤާނޫނުއަސާސީގެ 49 ވަނަ މާއްދާގައި އޮތް އިރު، 'ތަޙުޤީޤުގެ ބޭނުމަށް' ހައްޔަރު ކުރުމަކީ ޤާނޫނު ދަންނަ ކަމެއް ނޫނެވެ." މި ފަދައިންނެވެ.

ޕީޖީގެ ވާހަކަތަކަށް އިޝާރާތްކޮށް މަލީހް ވިދާޅުވެފައިވަނީ ،ހުސް ވާހަކަތަކުން ރައްޔިތުން ގޯނިފުލަށް ލެވުނު ޒަމާން މާޒީވެ ގޮސްފިކަމަށެވެ.

އީސާގެ މައްސަލައާއި ގުޅޭގޮތުން ވަނީ ގިނަ ބައެއްގެ މެދުގައި ޚިޔާލުތަފާތުވެފައެވެ. އީސާ ހައްޔަރު ކުރުމުގެ ހުއްދަ ލިބެންޖެހޭ ކަމަށް ގިނަ ބަޔަކު ދަނީ ބުނަމުންނެވެ. އެކަމަށް އިޝާރާތްކޮށް އެކި ފަރާތްތަކުން ދަނީ ޓްވީޓްތައް ކުރައްވަމުންނެވެ.

"ނޫ ޤާނޫނުއަސާސީގެ ދަށުން، ބަންދު މީހާ ކުރެން ހޭވެސް އަހައި ނުލައި 53 ދުވަސް، ނުވަތަ 'ވާނުވާ' ވެސް ޖެހޭ. 'ފެހި' ޤާނޫނުއަސާސީން އެނިޒާމު އެއްކޮށް ބަދަލުކޮށް، ގިނަވެގެން 24 ގަޑިއިރުތެރޭ ފަނޑިޔާރެއްގ ކުރިމައްޗަށް ހާޒިރުކުރަންޖެހޭ ގޮތަށް ހެދި. ތާރީޚު ކިޔުއްވާ!" ޕީޖީ ޝަމީމްގެ ޓްވީޓެއްގައި ވިދާޅުވިއެވެ.

މިއީ މިކަމާއި ގުޅޭގޮތުން ކުރެވޭ ބަހުސަށް އެ ބޭފުޅާ ދެއްވި ލަފައެކެވެ. އަދީ މީގެ އިތުރުން ކުރެއްވި ޓްވީޓެއްގައި "އަޅުގަނޑާ ރަސްމީ ދާއިރާއިން ބެހޭނެ ކަމަކީ ދަޢްވާ ކުރުން..ކަމެއް އެނގިފަ އޮތަކަސް އެ ހިސާބަކުން ނުނިމޭނެ. އެކަން ވާނެ، ޤާނޫނަށް ފެތިގެން، … ކަމާބެހޭ ދާއިރާއިން އައިމަ، ދެން އެބަލާފަ، ދެން ކުރާނެ ދަޢްވާއެއް އަޅުގަނޑަށް އެނގޭނީ" މިފަދައިން ޝަމީމް ވިދާޅުވެފައިވެއެވެ.