އަމީތާބް ބައްޗަން ހިމަނައިގެން "ޕާ" އާއި "ޗީނި ކުމް" ފަދަ ކާމިޔާބް ފިލްމުތައް ޑައިރެކްޓްކޮށްފައިވާ އާރް ބަލްކީގެ އާ ފިލްމަށް އަމީތާބާއި ދަނޫޝް ސޮއިކޮށްފި އެވެ.
އަދި ވަކި ނަމެއް ހަަމަޖެހިފައި ނުވާ އެ ފިލްމަށް ދަނޫޝް ސޮއި ކުރިކަން އޭނާ ވަނީ ޓްވިޓާ މެދުވެރިކޮށް ކަށަވަރުކޮށް ދީފަ އެވެ.
ސޯނަމް ކަޕޫރާ އެކު "ރާންޖަނާ" އިން ބޮލީވުޑަށް މި އަހަރު ތައާރަފްވި ސައުތު އިންޑިއާގެ މަޝްހޫރު އެކްޓަރު އަދި ރަޖްނީކާންތުގެ ދަނބިދަރިފުޅު ބުނީ އޭނާގެ ދެވަނަ ހިންދީ ފިލްމަކީ ބަލްކީގެ އާ ފިލްމް ކަމަށެވެ.
އަދި ބަލްކީ އާ އެކު މަސައްކަތް ކުރަން ފުރުސަތު ލިބުމުން ވަރަށް އުފަލުން ހުރި ކަމަށް "ކޮލަވަރީ ޑީ" ލަވަ ވެސް ކިޔައިގެން ބޮޑު މަޝްހޫރު ކަމެއް ހޯދި ދަނޫޝް ބުންޏެވެ.
ބަލްކީގެ އާ ފިލްމާ ބެހޭ ގޮތުން މިހާތަނަށް އެއްވެސް އިތުރު މައުލޫމާތެއް ނުލިބެ އެވެ. އެހެންވެ މިއީ ކޮން ކަހަލަ އަދި ކޮން ބަތަލާއިންނެއް ހިމެނޭ ފިލްމެއް ކަމެއް ވެސް އަދި ނޭނގެ އެވެ.
ފިލްމުގެ މަސައްކަތް ފަށާނެ ދުވަހެއް ވެސް އަދި އެއްވެސް ފަރާތަކުން ހާމަކޮށްފައެއް ނުވެ އެވެ.