އައްޑޫ ސިޓީން އިތުރު 15 މީހަކު ކޮވިޑް-19 އަށް ޕޮޒިޓިވް ވެއްޖެއެވެ.
އައްޑޫ އިމަޖެންސީ އޮޕަރޭޝަން ސެންޓަރުން ބުނީ މިއަދު ހަވީރު 6 ޖެހުމާއި ހަމައަށް ހިތަދޫން ފަސް، މަރަދޫން ހަތަރު ކޭސް، މަރަދޫފޭދޫން އެއް ކޭސް އަދި ހުޅުދޫ އިން ފަސް ކޭސް ފެނިފައިވާ ކަމަށެވެ. މީގެރެއިން ހިތަދޫން ފެނުނު އެއް ކޭސް އާއި ހުޅުދޫން ފެނުނު ދެ ކޭސް އަކީ ރެންޑަމް ސާމްޕަލްގެ ތެރެއިން ފެނުނު ކޭސްތަކެއް ކަމަށް އެ ސެންޓަރުން ބުނެއެވެ.
އެއާއެކު ހިތަދޫގައި ކޮވިޑްގެ 106 އެކްޓިވް ކޭސް އުޅޭއިރު، ފޭދޫގައި 10 ކޭސް، ހުޅުދޫގައި 52 ކޭސް އަދި މީދޫގައި ހަތް ކޭސް، މަރަދޫގައި 10 ކޭސް އަދި މަރަދޫފޭދޫގައި ދެ ކޭސް އުޅޭ ކަމަށް އެ ސެންޓަރުން ބުނެއެވެ. އެއާއެކު އައްޑޫގައި ކޮވިޑްގެ 190 އެކްޓިވް ކޭސް މިހާރު އެބަ އުޅެއެވެ.
އަދި ކޮވިޑަށް ޕޮޒިޓިވްވި މީހުންގެ ތެރެއިން 47 މީހަކު ބަލިން ރަނގަޅުވެފައިވާއިރު، ހަތަރު މީހަކަށް އަންނަނީ ހޮސްޕިޓަލުގައި ފަރުވާ ދެމުންނެވެ. އަދި އެކަކު ވަނީ މި ބަލީގައި އައްޑޫ އިން ނިޔާވެފައެވެ.
ކޮވިޑް ކޭސްތައް ފެންނަމުންދާތީ އެޗްޕީއޭ އިން ވަނީ ހަތް ދުވަހުގެ މުއްދަތަށް އައްޑޫގައި އަޅާފައިވާ ފިޔަވަޅުތައް އިތުރަށް ވަރުގަދަކުރަން ނިންމާފައެވެ. އެގޮތުން ހަވީރު ހަތަރަކުން ފެށިގެން ފަތިހު 4:00 އަށް، އެއްގަމު އުޅަނދުފަހަރު ދުއްވުމާއި، މަގުމައްޗާއި އާންމު ތަންތަނަށް މީހުން ނިކުތުން މަނާކޮށްފައެވެ. މީގެކުރިން ކާފިއު ހިންގަމުން އައީ ހަވީރު 6 އިން ފެށިގެން ފަތިހު ހަތަރަކާއި ހަމައަށެވެ.
އަދި އައްޑޫގައި އެއް އަވަށުން އަނެއް އަވަށަށް އަދި އެއް ގެއިން އަނެއް ގެއަށް ޒިޔާރަތް ކުރުން ހުއްޓާލުމަށާއި، ޕާޓީތަކާއި، ޙަފްލާތަކާއި، ރަސްމިއްޔާތުތައް ބޭއްވުން ހުއްޓާލުމަށާއި، އެއްފަހަރާ ތިން މީހުންނަށްވުރެ ގިނަމީހުން މަގުމައްޗާއި އާންމު ތަންތަނުގައި އެއްވެއުޅުން ހުއްޓާލުމަށް ވެސް ވަނީ އަންގާފައެވެ.
މީގެއިތުރުން ސެލޫންތަކާއި، ޖިމްތާކާއި، ބޯކޮށާ ތަންތަން ބަންދުކުރުމަށާއި، ހުރިހާ ކުޅިވަރު ހަރަކާތްތަކާއި ކަސްރަތު ހަރަކާތްތައް ހިންގުން ހުއްޓާލުމަށާއި، ފިރާތަކުން ޚިދުމަތް ދޭއިރު ހެލްތް ޕްރޮޓެކްޝަން އެޖެންސީން އާންމުކޮށްފައިވާ ގައިޑްލައިނާ އެއްގޮތަށް ޓެކްސީގެ ޚިދުމަތް ދިނުމުގެ އިތުރުން ހޮޓާތަކާއި، ކެފޭތަކާއި، ރެސްޓޯރަންޓް ތަކުން ދެމުންގެންދާ ޚިދުމަތްތައް ހުއްޓާލުމަށް ވަނީ އަންގާފައެވެ. މީގެ ތެރޭގައި ޓޭކްއަވޭ އާއި ޑެލިވަރީގެ ޚިދުމަތެއް ނުހިމެނެއެވެ. ނަމަވެސް ކާފިއު ވަގުތުގައި އެ ދެ ހިދުމަތް ވެސް ނުދެވޭނެއެވެ.