އިންޓަނޭޝަނަލް އެއިޑް ކެމްޕެއިން(އައިއޭސީ) މޯލްޑިވްސްއިން ދިވެހިންގެ އެހީގައި ޣައްޒާގެ ގެދޮރު ބިމާއި ހަމަވެ، ހާލުގައި ޖެހިފައިވާ 40 އާއިލާއަކަށް ގޮދަޑިއާއި ރަޖާ ފޯރުކޮށްދީފިއެވެ.
މީގެ ކުރިން ވެސް އައިއޭސީއިން ވަނީ ދިވެހީންގެ ފަރާތުން ދިން އެހީ ނަގުދު ފައިސާގެ ގޮތުގައި ފަލަސްތީނުގެ އާއިލާތަށް ހަދިޔާކޮށްފައެވެ. އައިއޭސީން ބުނީ ފައިސާގެ އެހީ ތިން ޕާޓްނަރެއް މެދުވެރިކޮށް ޣައްޒާގެ 90 އާއިލާއަށް, ކޮންމެ އާއިލާއަކަށް 100 އެމެރިކާ ޑޮލަރުގެ މަގުން ފޯރުކޮށްދެވިފައިވާ ކަމަށެވެ.
މީގެއިތުރުން އައިއޭސީން ވަނީ ގައްޒާގެ އަލް ޝިފާ ހޮސްޕިޓަލަށް ކަރަންޓު ދިނުމަށް ތެޔޮ ވެސް ހަދިޔާކޮށްފައެވެ. އަލް ޝިފާ ހޮސްޕިޓަލަކީ ފަލަސްޠީނުގައި ހުންނަ އެންމެ ބޮޑު ހޮސްޕިޓަލް ކަމަށްވާއިރު މި ހޮސްޕިޓަލަކީ އެންމެ ބޮޑަށް އަނިޔާ ވާ މީހުންނަށް ފަރުވާދެމުންދާ ހޮސްޕިޓަލު ކަމަށް އައިއޭސީން ބުންޏެވެ.
އަދި ހަމަލާތަކުގެ ސަބަބުން ކަރަންޓުގެ ދަތިކަން ކުރިމަތިވަމުން ދާތީ ދިވެހީންގެ އެހީގެ ގޮތުގައި 2547 ލީޓަރުގެ ތެޔޮ އެ ހޮސްޕިޓަލަށް ހަދިޔާކޮށްފައިވާ ކަމަށް އައިއޭސީން ބުންޏެވެ.
މިހާރު ވެސް އައިއޭސީގެ ފަރާތުން ވަނީ ފަލަސްޠީނުގެ ރައްޔިތުންނަށް އެހީވުމަށް ފުރުޞަތު ހުޅުވާލާފައެވެ. އަންނަ ޖޫން މަހުގެ 5 ވަނަ ދުވަހާއި ހަމަޔަށް ބޭނުންވާ ފަރާތްތަކަށް އެހީތެރި ވެވޭނެ ކަމަށް ވެސް އައިއޭސީއިން ބުނެއެވެ.