އަންހެނުންނާ ދެކޮޅަށް ހިންގާ އަނިޔާވެރިކަމާއީ ނާއިންސާފާ ދެކޮޅަށް، އަސުރުމާ ކުލައިގެ ސާޅީ އެޅި އަންހެން އެކްޓިވިސްޓުން ހިމެނޭ ގްރޫޕެއްގެ ވާހަކަ ކިޔައިދޭ "ގުލާބް ގޭންގް" އަންހެނުންގެ ދުވަހުގެ ގޮތުގައި ފާހަގަ ކުރާ މާޗް 7 ގައި ރިލީޒް ކުރާ ގޮތަށް ހަމަޖައްސައިފި އެވެ.
އެ ގްރޫޕަކީ އިންޑިއާގެ މެދުތެރޭގެ ސަރަހައްދެއް ކަމަށްވާ ބުންދެލްހަންދުގައި ހަރަކާތްތެރިވާ، މުޅިން ވެސް އަންހެނުން ހިމެނޭ ގްރޫޕެކެވެ.
ފިލްމްގެ ޕްރޮޑިއުސަރު އަނޫބަވް ސިންހާ ވެސް ވަނީ މިކަން ކަށަވަރުކޮށް ދީފަ އެވެ. އޭނާ ބުނީ އަންހެނުންގެ ހަރަކާތްތަކެެއް ކިޔައިދޭ މި ފިލްމް އަންހެނުންގެ ދުވަހު ރިލީޒް ކުރުމަކީ އެންމެ ރަނގަޅު ގޮތް ކަމަށެވެ.
"ގުލާބް ގޭންގް" އިސް ލީޑަރުގެ ރޯލުން ފެނިގެން ދާނީ މަދޫރީ ޑިކްޝިޓެވެ. އަދި މި ފިލްމްގެ ނެގަޓިވް ރޯލަކުން ޖޫހީ ޗަވްލާ ވެސް ފެނިގެން ދާނެ އެވެ.
މިއީ 1990 ގެ އަހަރުތަކުގައި ބޮލީވުޑްގައި އެންމެ ވިދާލި އަދި އެންމެ ވާދަވެރި ދެ ތަރިން ކަމަށްވާ މަދޫރީ އާއި ޖޫހީ އެއް ފިލްމަކުން ފެންނަ ފުރަތަމަ ފަހަރު ވެސް މެ އެވެ. އެހެންވެ މިއީ ބެލުންތެރިން މި ފިލްމަށް ޝައުގުވެރި ވާނެ އިތުރު ސަބަބެކެވެ.
އެ ދެ ތަރިންގެ އިތުރުން މާހީ ގިލް، ޝިލްޕާ ޝުކްލާ އަދި ތަނިޝްތާ ޗެޓަޖީ "ގުލާބް ގޭންގް" އިން ފެނިގެން ދާނެ އެވެ.
މި ފިލްމް ޑައިރެކްޓްކޮށްފައި ވަނީ އަލަށް ޑައިރެކްޓަރުގެ ގޮނޑި ހޫނު ކުރި ސޯމިކް ސެން އެވެ.
"ގްލާބް ގޭންގް" ގެ ޓްރެއިލާ އަށް ވެސް ގިނަ ބަޔަކު މިހާރު އަންނަނި އިންތިޒާރު ކުރަމުންނެވެ.