ރައްޔިތުންނަށް އެހާ ހެޔޮއެދޭނަމަ މިހާލަތުގައި އެންމެ ރަނގަޅު ވާނީ ހުކުމް ކޮށްފައިވާ 5 މިލިއަން ޑޮލަރު ދައުލަތަށް ދެއްވުން ކަމަށް ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ.
މެމްބަރު ނިހާދު ކުރެއްވި ޓްވީޓްގައި 5 މިލިއަން ޑޮލަރަކީ ރާއްޖެއަށް ވަރަށް ބޮޑު އެއްޗެއް ކަމަށް ވިދާޅުވެފައެވެ.
Rayyithunnah ehaa heyo edhey nama mihaalathugai Enme Rangalhu vaanee Hukum kohfaivaa 5 million dollar avahah Dhaulathah dhinun! 5 million dollar akee Raajje ah Varah bodu echcheh! Ava’s kurey!!!
— Feydhoo Meehaa (Mohamed Nihad) (@nihad_m) May 26, 2021
" ރައްޔިތުންނަށް އެހާ ހެޔޮއެދޭ ނަމަ މިހާލަތުގައި އެންމެ ރަނގަޅު ވާނީ ހުކުމް ކޮށްފައިވާ 5 މިލިއަން ޑޮލަރު އަވަހަށް ދައުލަތަށް ދިނުން! 5 މިލިއަން ޑޮލަރަކީ ރާއްޖެއަށް ވަރަށް ބޮޑު އެއްޗެއް! އަވަސް ކުރޭ!!!" މެމްބަރު ނިހާދު ވިދާޅުވިއެވެ.
މެމްބަރު ނިހާދު މިހެން ވިދާޅުވެފައި މިވަނީ ރައްޔިތުންނަށް އެންމެ ހެޔޮއެދޭ ފަރާތަކީ ކުރީގެ ރައީސް ޔާމީން ކަމަށް އެ މަނިކުފާނަށް ތާއީދު ކުރައްވާ ފަރާތްތަކުން ބުނަމުންގެންދާ ވަގުތެއްގައެވެ. އަދި މިހާރު ރާއްޖެ މިއޮތް ހާލަތުން ރައީސް ޔާމީން ވެރިކަމުގައި ހުންނެވި ނަމަ އަރައިގަނެވޭނެ ކަމަށް ވެސް ބައެއް ފަރާތްތަކުން ބުނަމުން ގެންދެއެވެ.
މަނީ ލޯންޑަރިންގެ ކުށް ސާބިތުވެ ރައީސް ޔާމީން މިހާރުވެސް ގެންދަވަނީ ފަސް އަހަރުގެ ޖަލު ހުކުމެއް ތަންފީޒުކުރައްވަމުންނެވެ. ގއ. ވޮޑަމުލާ ދޫކޮށްގެން ދައުލަތަށް ލިބެން ޖެހޭ އެއް މިލިއަން ޑޮލަރު ލޯންޑާ ކުރިކަން ސާބިތުވެ ރައީސް ޔާމީންގެ މައްޗަށް ކްރިމިނަލް ކޯޓުން ހުކުމް ކުރީ، 28 ނޮވެމްބަރު 2019 ގަ އެވެ. އެ މައްސަލައިގައި ފަސް މިލިއަން ޑޮލަރުން އެ މަނިކުފާނު ވަނީ ޖޫރިމަނާ ކުރެވިފައެވެ.
ވޮޑަމުލާގެ މައްސަލައިގައި ރައީސް ޔާމީނަށް ފަސް އަހަރުގެ ހުކުމެއް އިއްވާފައިވާއިރު، ރ. ފުއްގިރި ކުއްޔަށް ދޫކުރުމުގެ މުއާމަލާތާ ގުޅިގެން މަނީ ލޯންޑްރިން އަދި ރިޝްވަތު ގަބޫލުކުރުމުގެ ދައުވާވެސް އެމަނިކުފާނުގެ މައްޗަށް ވަނީ އުފުލައިފަ އެވެ.
މާފުށީ ޖަލުގައި ކޮވިޑް ފެތުރެމުންދާތީ ރައްކާތެރިކަމުގެ ފިޔަވަޅެއްގެ ގޮތުން ޔާމީން ރޭ ވަނީ ގޭބަންދަށް ބަދަލުކޮށްފަ އެވެ. ޔާމީން ގޭ ބަންދަށް ބަދަލުކޮށްފައިމިވަނީ އެމަނިކުފާނު ގެޔަށް ބަދަލުކޮށްދިނުމަށް އެދި އާއިލާ އަދި އިދިކޮޅު ލީޑަޝިޕްގެ ބޭފުޅުން ވަނީ ރައީސް އިބްރާހިމް މުހައްމަދު ސޯލިހުގެ އަރިހުން އެދިވަޑައިގަންނަވާފައިވާ ދަނޑިވަޅެއްގައެވެ.