ހަރުކަށި ފިކުރު ފެތުރުމުގެ ތުހުމުގައި ތިން މީހަކު ހައްޔަރުކޮށްފިއެވެ.
ހުޅުމާލޭގައި އިއްޔެ ހަވީރުން ފެށިގެން ފުލުހުން ހިންގި ހާއްސަ އޮޕަރޭޝަނުގައި ހައްޔަރު ކުރި ތިން މީހުންގެ ތެރޭގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް ދެވުނު ހަމަލާ އާއި ގުޅުން ހުރި މީހަކުވެސް ވަނީ ހައްޔަރުކޮށްފައެވެ. ނަމަވެސް ފުލުހުން މި އޮޕަރޭޝަން އާއި ގުޅޭގޮތުން މައުލޫމާތު ހާމަކޮށްފައިނުވެއެވެ.
މައުލޫމާތު ލިބިފައިވާ ގޮތުގައި އިއްޔެގެ އޮޕަރޭޝަންގައި ހުޅުމާލެ ކައިރީ އަޅާފައިއޮތް އުޅަނދަކަށް ފުލުހުން އަރައި ވަނީ ފާސްކޮށްފައެވެ.
މަޖްލިސްގެ ރައީސް މުހައްމަދު ނަޝީދުއަށް ދެވުނު ހަމަލާއަށް ފަހު ފުލުހުން އަންނަނީ މާލެ އާއި އަތޮޅުތަކުގައި ތިބި ހަރުކަށި ފިކުރު ފަތުރާ ފަރާތްތަކަށް އަމާޒުކޮށް ހާއްސަ އޮޕަރޭޝަނެއް ފަށާފައެވެ. އެގޮތުން އައްޑޫން 9 މީހަކު ހައްޔަރުކޮށް އެކަކު ވަނީ ދޫކޮށްލާފައެވެ.
ނަޝީދުއަށް ދެވުނު ހަމަލާއަށް ފަހު މިހާތަނަށް ހަތަރު މީހަކު ފުލުހުން ހައްޔަރުކޮށްފައިވާ އިރު މި ހަތަރު މީހުންނަކީވެސް ހަރުކަށި ފިކުރުގެ މީހުން ކަމަށް ފުލުހުން ވަނީ ބުނެފައެވެ.
ނަޝީދުއަށް ދެވުނު ހަމަލާ އާއި ގުޅިގެން ފުލުހުން ހައްޔަރު ކޮށްފައިވަނީ އަހުމަދު އަދުހަމް، 25، އާއި މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ސައިކަލުގެ ވެރި މީހާ ތަހުމީން އަހްމަދު، 32 އެވެ. އޭގެ އިތުރުން މި މައްސަލާގެ ތުހުމަތުގައި ބ. ދަރަވަންދޫއިން މީހަކު ވަނީ ހައްޔަރުކޮށްފައެވެ. ދަރަވަންދޫއިން ހައްޔަރު ކުރީ ލ.ގަން، ދުންފިނި އުފާ، އަހުމަދު ފާތިހު، 23އެވެ.
ފުލުހުން ބުނީ ދަރަވަންދޫ އިން ހައްޔަރު ކުރި ފާތިހު އަކީ ގޮއްވާލި ސައިކަލް އެސަރަހައްދުގައި ބެހެއްޓި މީހާއެވެ. މި ހަމަލާގެ ތުހުމަތަށް ހައްޔަރު ކުރި މީހުންގެ ޑީއެންއޭ ގޮއްވާލުމަށް ގެންގުޅު ސާމާންތަކުން ފެނިފައިވާ ކަމަށް ފުލުހުން ވަނީ ބުނެފައެވެ.