ރާއްޖޭގެ އެކި ކަންކޮޅުތަކުގައި ކޮވިޑު ފެތުރެމުންދާތީ އަތޮޅުތަކުގެ ހާލަތު ބެއްލެވުމަށް ބޭފުޅުން ހަމަޖައްސަވައިފިއެވެ.
ހެލްތު މިނިސްޓްރީން ބުނީ ރާއްޖޭގައި ހަލުވި ކަމާއި އެކު ކޮވިޑު ފެތުރުމުންދާތީ އަތޮޅުތަކުގެ ހާލަތު ބެލުން އިތުރަށް ހަރުދަނާ ކުރުމަށާއި ކޯޑިނޭޝަން ހަރުދަނާ ކުރުމަށް ކޮންމެ އަތޮޅަކަށް ސަރުކާރުގެ ފަރާތުން އިސް ބޭފުޅެއް ރައީސް އިބްރާހިމް މުހައްމަދު ސޯލިހު މިއަދު ހަމަޖައްސަވާފައިވާ ކަމަށެވެ.
އެގޮތުން އެކި މިނިސްޓްރީތަކުގެ ސްޓޭޓް މިނިސްޓަރުންނާއި ޑެޕިއުޓީ މިނިސްޓަރުން ފެންވަރުގެ ބޭފުޅުން ވަނީ އަތޮޅުތަކަށް ހަމަޖައްސަވާފައެވެ.
މި ބޭފުޅުން މަސައްކަތް ކުރަން ހަމަޖެހިފައި ވަނީ އަތޮޅުތަކުގެ ޓާސްކްފޯސްތަކާ ގުޅިގެންނެވެ. މި ބޭފުޅުންގެ ޒިންމާއަކީ އަތޮޅުތަކުގެ ހާލަތު ބެލުމާއި ދަތިވާ ކަންކަމުގައި ހެލްތު އިމަޖެންސީ އޮޕަރޭޝަނާ އެކު މަޝްވަރާކޮށް ހައްލު ހޯދުމެވެ.
ރާއްޖޭގެ 70 އަށް ވުރެ ގިނަ ރަށުގައި ވަނީ ކޮވިޑު ފެތުރިފައެވެ. އެގޮތުން ބައެއް އަތޮޅުތަކުގައި ކޮވިޑު ދަނީ ހަލުވި ކަމާއި އެކު ފެތުރެމުންނެވެ. ހާއްސަކޮށް ހުވަދޫ، އައްޑޫ އަދި ފުވައްމުލަކުގައި ގިނަ އެކްޓިވް ކޭސްތަކެއް ވަނީ ފެނިފައެވެ.