ރައްކާތެރިކަމުގެ ފިޔަވަޅުތަކާއެކު މިސްކިތުގައި ނަމާދު ކުރެވެންވާނެ: ދީދީ

ތަބާވާންޖެހޭ ރައްކާތެރިކަމުގެ ފިޔަވަޅުތަކާއެކުުމިސްކިތްތަކުގައި ނަމާދު ކުރެވެންވާނެ ކަމަށް ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ވިދާޅުވެއްޖެއެވެ.

މިސްކިތްތަކުގައި ނަމާދު ކުރުން ހުއްޓާލާ މާލޭގެ މިސްކިތްތައް ތަޅުލުމާއި ގުޅިގެން އެކަމަށް އިޝާރާތް ކުރައްވާ ކުރެއްވި ޓްވީޓެއްގައި ޑރ. އަހުމަދު އަބްދުﷲ ދީދީ ވިދާޅުވީ ބަލިމަޑުކަމުގެ ޙާލަތުގައިވިއަސް މިސްކިތްތައް އެއްކޮށް ބަންދުކުރުމަކީ ބަލައިގަނެވޭނެ ކަމެއް ނޫންކަމަށެވެ.

"ތަބާވާންޖެހޭ ރައްކާތެރިކަމުގެ ފިޔަވަޅުތައް ‘އިންފޯސް’ ކުރުމާއެކު މިސްކިތްތަކުގައި ނަމާދުކުރެވެންވާނެ!" ޑރ. އަހުމަދު އަބްދުﷲ ދީދީ ވިދާޅުވިއެވެ.

އެހެން ޓްވީޓެއްގައި ދީދީ ވިދާޅުވީ "އިސްލާމީ ވެރިއެއްގެ އަސާސީ މަސްއޫލިއްޔަތަކީ ދީން ޙިމާޔަތްކޮށް، ދީނުގެ ޙުކުމްތަކާ ޚިލާފުނުވާނޭ ގޮތެއްގެ މަތިން ދުނިޔަވީ ސިޔާސަތު ރާވައި ހިންގުން ކަމުގައިވާއިރު، ބަލިމަޑުކަމުގެ ޙާލަތުގައިވިއަސް މިސްކިތްތައް އެއްކޮށް ބަންދުކުރުމަކީ ބަލައިގަނެވޭނެ ކަމެއް ނޫން." މި ފަދައިންނެވެ.

މިސްކިތްތައް ބަންދު ކުރުމާއި ގުޅިގެން ގިނަ ބަޔަކު ދަނީ ސަރުކާރަށް ފާޑުކިޔާ މިސްކިތްތައް ހުޅުވަންޖެހޭ ކަމަށް ބުނަމުންނެވެ. މިކަމުގައި އެންމެ ގަދަޔަށް ވަކާލާތުކޮށް ސޯޝަލް މީޑިއާގައި އަޑު އުފުލާތަން ފެންނަނީ ދީނީ ޢިލްމުވެރިންނެވެ. އެހެނިހެން ބައެއް ފަރާތްތަކުން ވެސް އިދިކޮޅު ޕާޓީތައް ހިމެނޭ ގޮތަށް މި ކަމަށް ފާޑުކިޔާތަން ފެނިގެންދެއެވެ.